ޕްރެޝަރ ބޮޑުވުމުން، ޔޫޓީއެފް އެގްރީމެންޓް ހާމަކުރަން އެމްޑީޕީގެ ޗެއަރޕާސަން ގޮވައިލައިފި
އިންޑިއާ ސަރުކާރާއި ދިވެހި ސަރުކާރާ ދެމެދު ވެފައިވާ އުތުރު ތިލަފަޅުގެ އެއްބަސްވުމުގެ މައުލޫމާތު ހާމަނުކުރަތީ ސަރުކާރާއި އެމްޑީޕީއަށް އެކިފަރާތްތަކުގެ ޕްރެޝަރު ބޮޑުވެ، އެ މައުލޫމާތު ސަރުކާރުން ރައްޔިތުންނަށް ސާފުކޮށްދިނުމަކީ ބޭނުންތެރި ކަމެއްކަމަށް އެމްޑީޕީގެ ޗެއަރޕާސަން ، ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ހަސަން ލަތީފް ވިދާޅުވީ ފޮރުވައިގެން ސިއްރުން ކަންކަން ކުރަން ނޫޅޭކަމާއި އިންޑިޔާގެ އެހީ ސަރުކާރުން ހޯދާގޮތްތަކުގެ މައުލޫމާތު ރައްޔިތުންނަށް ސާފުކޮށްދިނުމަކީ ބޭނުންތެރިކަމެއް ކަމަށެވެ.
"ޔޫޓީއެފް އެއްބަސްވުމުގައިވާ ކަންކަމުގެ މައުލޫމާތު ސަރުކާރުން ރައްޔިތުންނަށް ސާފުކޮށްދިނުމަކީ ބޭނުންތެރިކަމެއް. ފޮރުވައިގެން ސިއްރުން ކަންކަން ކުރަން ނޫޅޭކަމާއި އިންޑިއާގެ އެހީތެރިކަން ސަރުކާރުން ހޯދާގޮތްތަކުގެ މައުލޫމާތު ރައްޔިތުންނަށް ސާފުކޮށްދިނުމަކީ ބޭނުންތެރިކަމެއް" ހަސަން ލަތީފް ވިދާޅުވިއެވެ.
އުތުރުތިލަފަޅު އެއްބަސްވުމާ ގުޅޭ ގޮތުން މީގެ ކުރިން "ދިޔަރެސް" ނޫހުގެ ނޫސްވެރިޔާ އަހްމަދު އަޒާން ހޯދަން އެދުނު މައުލޫމާތު ހާމަކުރަން އިންފޮމޭޝަން ކޮމިޝަނަރު އޮފީހުން ޑިފެންސް މިނިސްޓްރީއަށް ވަނީ މިދިޔަމަހުގެ 14 ވަނަ ދުވަހު އަންގައިފައެވެ.
އެހެން ނަމަވެސް އުތުރުތިލަފަޅު ތަރައްގީކުރުމުގެ އެއްބަސްވުން ހާމަކުރަން އިންފޮމޭޝަން ކޮމިޝަނަރުގެ އޮފީހުން ޑިފެންސް މިނިސްޓްރީއަށް ދިން މުހުލަތު ހަމަވިއިރު ވެސް އެ އެއްބަސްވުން ވަނީ ހާމަނުކޮށެވެ.
އުތުރުތިލަފަޅުގެ އެއްބަސްވުން ހާމަނުކުރާތީ އިދިކޮޅުން ދަނީ ސަރުކާރަށް ފިއްތުންތައް ކުރިމަތިކުރުވަމުންނެވެ.
