އިންޑިއާއިން ރާއްޖޭގެ ދާޚިލީ ހުރިހާ ކަމަކަށް "އަތް ބާނާ" : ރައީސް ޔާމީން
އަވަށްޓެރި އިންޑިއާއިން ރާއްޖޭގެ ދާހިލީ ހުރިހާ ކަމަކަށް "އަތް ބާނާ" ކަމަށާއި މިހާރު ދިވެހި ދައުލަތް ވެސް ހިންގަނީ އިންޑިއާ ސަރުކާރުން ކަމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އިދިކޮޅު ލީޑަރު ރައީސް ޔާމީން އިސްކޮށް ހުންނަވައި، ރާއްޖޭގައި ތިބި އިންޑިއާ ސިފައިން ބޭލުމަށް ގޮވައިލައި އިދިކޮޅުން ކޯލިޝަނުން ގެންދަނީ "އިންޑިއާ އައުޓް"ގެ ނަމުގައި ކެމްޕެއިނެއް ހިންގަމުންނެވެ.
އެ ކެމްޕޭނުގައި މާލެއާއި ރާއްޖޭގެ އެކި ރަށްރަށުގައި އެއްވުންތައް ބާއްވަމުން ގެންދެއެވެ. އިދިކޮޅުން ބުނަމުން ދަނީ އިންޑިއާ ސިފައިން ރާއްޖޭގައި ތިބުމަކީ ރާއްޖޭގެ މިނިވަންކަމަށް އަސަރު ކުރާނެ ކަމެއް ކަމަށެވެ.
"އިންޑިއާ އައުޓް" ކެމްޕެއިނު ހަރަކާތުގެ ތެރެއިން އިއްޔެ ށ. ފުނަދޫއަށް ވަޑައިގެން ރައީސް ޔާމީން ވިދާޅުވީ އިންޑިއާ ސިފައިން ރާއްޖޭގައި ތިބުމުން، އެއް ގޮތަށް ވުރެ ގިނަ ގޮތް ގޮތުން ދިވެހިންނަށް އުނދަގޫވާ ކަމަށެވެ.
"އިންޑިއާ ރައްޔިތުންނަށް އަޅުގަނޑުމެން ދަންނަވާލަން ބޭނުން ވަނީ، ތިއީ އަަޅުގަނޑުމެންގެ ރަހުމަތްތެރިންނޭ، އަޅުގަނޑުމެންގެ ގާތް ބައެކޭ. އަޅުގަނޑުމެން މިއުޅެނީ އިންޑިއާއާ ދޭތެރޭ މައްސަލަ ޖެހިގެނެއް ނޫނޭ" ރައީސް ޔާމީން ވިދާޅުވިއެވެ.
ނަމަވެސް މިއަދު ދިވެހި ދައުލަތް ވެސް ހިންގަނީ އިންޑިއާ ސަރުކާރުން ކަމަށް ތުހުމަތު ކުރައްވައި ރައީސް ޔާމީން ތަކުރާރުކޮށް ވިދާޅުވީ، އެކަމަށް ޖާގަ ނުދެއްވާނެ ކަމަށެވެ.
