އެމްޑީޕީއަށް އޮތް އިތުބާރު ދެމެހެއްޓޭނީ އިންތިއަށް:ވައްޑެ
ވެރިކަން ކުރާ މައި ޕާޓީ އެމްޑީޕީއަށް އެ ޕާޓީގެ މެމްބަރުން ކުރާ އިތުބާރު ދެމެހެއްޓޭނީ، މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)ފަދަ މީހަކު ޕާޓީގެ ޗެއާޕާސަންކަމަށް އިންތިހާބު ކޮށްގެން ކަމަށް އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.
އެމްޑީޕީގެ ޗެއާޕާސަންގެ މަގާމަށް ވާދަ ކުރެއްވުމަށް އިންތި ވަނީ ނިންމަވައިފައެެވެ. އިންތި ވަނީ މީސްމީޑިއާ މެދުވެރިކޮށް އެކަން ހާމަކުރައްވައިފައެވެ.
އިންތިގެ އިތުރުން، އިކޮނޮމިކް މިނިސްޓަރު ފައްޔާޒު އިސްމާއީލްއާއި އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވެސް އެ މަގާމަށް ވާދަކުރައްވަން ވަނީ ނިންމައިފައެވެ.
ވައްޑެ ކުރެއްވި ޓްވީޓުގައި ވިދާޅުވީ އެމްޑީޕީއަށް މިހާރު އެންމެ މުހިންމީ އިތުބާރު ހިފެހެއްޓުން ކަމަށާއި، އެކަމަށް އެންމެ ލާއިގު ބޭފުޅަކީ އިންތި ކަމަށެވެ.
އެމްޑީޕީގެ ޗެއާޕާސަންގެ އިންތިހާބު ބާއްވަނީ ކުރިން އެ މަގާމުގައި ހުންނެވި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފުގެ މަގާމުގެ ދައުރު އިއްޔެ ހަމަވުމާ ގުޅިގެންނެވެ.
އަންނަ އޭޕްރީލްމަހުގެ 16ގައި ބާއްވާ މި އިންތިހާބަށް ކުރިމަތިލުމުގެ ފުރުސަތު ހުޅުވައިލީ އިއްޔެގެ ވަގުތެއްގައެވެ.
