ޖިއާންގެ މަރު: 12 މިލިއަން ނަގައި ނުދިން މައްސަލަ ހައިކޯޓުން ބަލަން އަންގައިފި
ޑަބްލިއު ކޮންސްޓްރަކްޝަންއިން ހަދަމުން ދިޔަ މ. ނަލަހިޔާ މަންޒިލްގެ ފަސްވަނަ ފަންގިފިލާއިން 2018ވަނަ އަހަރުގެ ޑިސެމްބަރ މަހުގެ 16ވަނަ ދުވަހު، ސިމެންތި ބަސްތާއެއް ވެއްޓި ބަނގްލަދޭޝްގެ އުމުރުން ތިން އަހަރުގެ ރައުޝަން ޖިއާން މަރުވި މައްސަލައިގައި ގެއްލުމުގެ ބަދަލަށް ދަށު ކޯޓުން ނަގައިނުދިން 12.9 މިލިއަން ރުފިޔާގެ މައްސަލަ ހައި ކޯޓުން ބަލަން ސުޕްރީމް ކޯޓުން އަންގައިފިއެވެ.
ޖިއާން މަރުވި މައްސަލައިގައި އޭނާގެ މައިންބަފައިން ކުންފުންޏާ ދެކޮޅަށް ސިވިލް ކޯޓުގައި ދައުވާކުރީ 17.4 މިލިއަން ރުފިޔާގެ ބަދަލެއް ހޯދުމަށެވެ.
މި ހާދިސާއާ ގުޅިގެން ސިވިލް ކޯޓުން މިދިޔަ އަހަރު، ޖިއާންގެ މައިންބަފައިންނަށް ނަގައިދިނީ 4.5 މިލިއަން ރުފިޔާގެ ބަދަލެކެވެ. ބާކީ އޮތް 12.9 މިލިއަން ރުފިޔާ ނަގައިދެވެން ނެތް ކަމަށް ނިންމުމުން އެ މައްސަލަ އިސްތިއުނާފް ކުރިޔަސް، ހައި ކޯޓުން ނިންމީ މައްސަލަ ބަލައިނުގަތުމަށެވެ.
ޖިއާންގެ މައިންބަފައިންގެ ފަރާތުން އިސްތިއުނާފްކުރި އެ މައްސަލަ ހައި ކޯޓުން ބަލައިނުގަތީ އިސްތިއުނާފް މުއްދަތު ހަމަވެފައި އޮތުމުން ކަމަށް އެއިރު ބުނެފައިވެއެވެ. އަދި ރަޖިސްޓްރާގެ އެ ނިންމުމަށް އެ ކޯޓުގެ ފަނޑިޔާރުންގެ މަޖިލީހުން ވެސް ވަނީ ތާއީދުކޮށްފައެވެ.
އެ ނިންމުން ޖިއާންގެ މައިންބަފައިންގެ ފަރާތުން ސުޕްރީމް ކޯޓުގައި އިސްތިއުނާފް ކުރުމުން އެ ކޯޓުން މިދިޔަ އާދިއްތަ ދުވަހު އެންގީ 10 ދުވަސް ތެރޭގައި އަލުން އެ މައްސަލަ ހައި ކޯޓަށް ހުށަހަޅައިފި ނަމަ، އެ މައްސަލަ ބަލައިގަތުމަށެވެ. އެއީ އިސްތިއުނާފް ލަސްވުމުގައި މަގްބޫލު ސަބަބެއް އޮތުމުން ކަމަށް ވެސް ސުޕްރީމް ކޯޓުން ބުނެފައިވެއެވެ.
ސުޕްރީމް ކޯޓުގެ ނިންމުމުގައި ވަނީ މައްސަލަ އިސްތިއުނާފަށް ހުށަހެޅީ އިސްތިއުނާފް މުއްދަތު ހަމަވިފަހުން ކަމަށް ވިޔަސް، މައްސަލަ ނިމުނު ގޮތުގެ ރިޕޯޓު ހޯދަން އެ މުއްދަތު ހަމަވުމުގެ ކުރިން އެ މީހުންގެ ފަރާތުން ސިވިލް ކޯޓުގައި އެދިފައިވާ ކަމަށެވެ. އަދި ރިޕޯޓް ލިބިފައި ވަނީ އެ މުއްދަތު ހަމަވިފަހުން ކަމަށް ވާއިރު، ރިޕޯޓް ނުލިބި އޮތްކަން ހައި ކޯޓަށް ސިޓީއަކުން އަންގައިފައި ވާތީ އިސްތިއުނާފް ކުރުމުގެ ނިޔަތް އެ މީހުންގެ އޮތްކަން އެނގޭ ކަމަށް ވެސް ސުޕްރީމް ކޯޓުގެ ނިންމުމުގައިވެއެވެ.
