އިންޑިއާއިން ނޫނީ ކުކުޅު ބިހާ ހިލަވެލި ނުލިބޭނެ ކަމަށް ބުނާ ވާހަކަ ރައްޔިތުން ގަބޫލެއް ނުކުރާނެ: މުހައްމަދު އިސްމާއީލް
އަވަށްޓެރި އިންޑިއާއިން ނޫނީ ކުކުޅު ބިހާއި ހިލަވެލި ނުލިބޭނެކަމަށް ބުނެ ސަރުކާރުގެ ބައެއް އިސް ބޭފުޅުން ދައްކަވާ ވާހަކަތައް ދިވެހި އެއްވެސް ރައްޔިތަކު ގަބޫލު ނުކުރާނެ ކަމަށް ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއީލް ވިދާޅުވެއްޖެއެވެ.
ރާއްޖޭގައި ތިބި އިންޑިއާ ސިފައިން ބޭލުމަށް ގޮވައިލައި އިދިކޮޅު ލީޑަރު، ރައީސް އަބްދުﷲ ޔާމީން އަބްދުލްޤައްޔޫމް އިސްވެ ހުންނަވައި ކުރިއަށް ގެންދަވާ "އިންޑިއާ އައުޓް" ކެމްޕެއިނަށް ފާޑުވިދާޅުވެ، އިންޑިއާގެ މުހިންމުކަން ހާމަކޮށްދެއްވުމަށް ދިފާއީ ވަޒީރު، މާރިޔާ އަހްމަދު ދީދީ ވިދާޅުވި އެއް ވާހަކައަކީ ރާއްޖެ އެތެރެ ކުރާ ކޮންމެ ތިން ބިހަކުން، ދެ ބިސް އެތެރެ ކުރަނީ އިންޑިއާއިން ކަމަށެވެ.
އެ ކަމަނާގެ މި ވާހަކަައަށް ގިނަ ބައެއްގެ ފާޑުކިޔުންތައް އަމާޒުވިއެވެ. "އިންޑިއާ އައުޓް"އާ ދެކޮޅަށް ވާހަކަ ދައްކާ ބައެއް މީހުން ބުނާ ގޮތުގައި، ރާއްޖެއަށް ފިޔާ، އަލުވި އަދި ހިލަވެލި ވެސް ދެނީ އިންޑިއާއިންނެވެ.
ޗެނަލް13ގެ "ނިއުސްޓޯކް" ޕްރޮގްރާމްގައި ރޭ ވާހަކަ ދައްކަވަމުން އިދިކޮޅު ކޯލިޝަނުގެ ހަރަކާތު ކޮމިޓީގެ ޗެއާކަން ވެސް ކުރައްވާ މުހައްމަދު ވިދާޅުވީ، މި ޒާތުގެ ވާހަކަތައް، މިހާރު ދިވެހި ރައްޔިތުން ގަބޫލު ނުކުރާނެ ކަމަށެވެ.
"ރައީސް ޔާމީންގެ ވެރިކަމުގައި އިންޑިއާއަކުން ނޫން ހިލަވެލި ގެނައީ. އެ ފަސް އަހަރަށް ވުރެ ގިނައިން، މި ރާއްޖޭގައި މަސައްކަތްތައް ކުރެވުނު ފަސް އަހަރެއް ނެތް." މުހައްމަދު ވިދާޅުވިއެވެ.
އޭނާ އިތުރަށް ވިދާޅުވީ ދިވެހީން، އިންޑިއާއިން ފިޔާ، އަލުވި އަދި ބިސް ހޯދަނީ ހިލޭ ނޫން ކަމަށާއި، އެ ތަކެއްޗަކީ ފައިސާ ދީފައި ގަންނަ އެއްޗެހި ކަމަށެވެ.
