މަރްޙޫމް ޖަލީލްގެ އާއިލާއަށް ރައީސް ޞާލިޙް ތައުޒިޔާ ވިދާޅުވެއްޖެ
ދައުލަތަށް ގިނަ ދުވަސްތަކެއްވަންދެން ޚިދުމަތްކުރައްވައިފައިވާ ބ. ކުޑަރިކިލު ނޫރާނީމާގެ މުޙައްމަދު ޖަލީލް ދެމިއޮތުމުގެ ޢާލަމަށް ދަތުރުކުރެއްވުމާ ގުޅިގެން، އެ ޢާއިލާއަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފޯނުން ގުޅުއްވައި ތަޢުޒިޔާ ވިދާޅުވެއްޖެއެވެ.
މަރްޙޫމް މުޙައްމަދު ޖަލީލުގެ އާއިލާއަށް ފޯނުން ގުޅުއްވައި ރައީސުލްޖުމްހުރިއްޔާ ދެއްކެވި ވާހަކަފުޅުގައި މަރްހޫމް ޖަމީލަކީ ދިވެހި ސަރުކާރަށާއި ރައްޔިތުންނަށް ވަރަށް އިޚްލާޞްތެރި ޚިދްމަތްތަކެއް ކޮށްދެއްވި އަދި ސަރުކާރުގެ ވަރަށް މުހިންމު މަޤާމުތަކެއް ފުރުއްވާފައިވާ ވަރަށް ޚިދުމަތްތެރި ބޭފުޅެއް ކަމުގައި ފާހަގަކުރެއްވިއެވެ.
މަރްޙޫމް މުޙައްމަދު ޖަލީލަކީ ރައްޔިތުންގެ ޚާއްޞަ މަޖިލީހުގެ ބ. އަތޮޅުގެ މެންބަރުކަމާއި، ބ. އަތޮޅު އެޓަރނީ ޖެނެރަލްގެ އެހީތެރިޔާކަމާ، ކުޑަރިކިލު ކޯޓުގެ ޤާޟީކަމާއި، އެޓޯލްސް މިނިސްޓްރީގެ ގިނަ މަޤާމުތަކެއް ފުރުއްވި ބޭފުޅެކެވެ. މީގެ ތެރޭގައި އެޓޯލްސް މިނިސްޓްރީގެ ސީނިއަރ އަންޑަރ ސެކްރެޓަރީގެ މަޤާމާއި، ވަކީލެއްގެ މަޤާމާއި، ޑިރެކްޓަރެއްގެ މަޤާމާއި، ސީނިއަރ އިންވެސްޓިގޭޓަރެއްގެ މަޤާމާއި، އިންވެސްޓިގޭޓަރެއްގެ މަޤާމު ހިމެނެއެވެ.
މީގެ އިތުރުން ވެސް މަރްޙޫމް މުޙައްމަދު ޖަލީލް ވަނީ 26 ފަހަރެއްގެ މަތިން 13 އަތޮޅެއްގެ އަތޮޅު އޮފީސް ހިންގަވާފައެވެ. މީގެ ތެރޭގައި ހއ. އަތޮޅު އޮފީހާއި، ހދ. އަތޮޅު އޮފީހާއި، ށ. އަތޮޅު އޮފީހާއި، ޅ. އަތޮޅު އޮފީހާއި، ކ. އަތޮޅު އޮފީހާއި، އއ. އަތޮޅު އޮފީހާއި، އދ. އަތޮޅު އޮފީހާއި، ފ. އަތޮޅު އޮފީހާއި، ތ. އަތޮޅު އޮފީހާއި، ލ. އަތޮޅު އޮފީހާއި، ގއ. އަތޮޅު އޮފީހާއި، ގދ. އަތޮޅު އޮފީހާއި، ޏ. އަތޮޅު އޮފީސް ހިމެނެއެވެ.
އުމުރުން 74 އަހަރުގައި ޖަލީލް އަވަހާރަވީ ވަރަށް ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށް ފަހު އިއްޔެ ހެނދުނު މާލޭގައި އޭނާ ދިރިއުޅުއްވާ ގޭގައެވެ.
