މަގުމަތިން ހޮވި ފަސްލައްކަ ރުޕީސް ވެރި ފަރާތަށް ރައްދުކުރި އިންޑިޔާގެ މުސްލިމް ކުއްޖަކަށް ތައުރީފް!
އިންޑިޔާގެ އުއްތަރަ ޕްރަދޭޝްގެ މަގުމަތިން ހޮވި ފަސްލައްކަ ރުޕީސް ވެރި ފަރާތަށް ރައްދުކުރި 10 އަހަރުގެ ކުއްޖަކަށް އެތައް ބަޔަކު ތައުރީފްކޮށްފިއެވެ.
ބޭރުގެ މީޑިއާތަކުގައި ބުނެފައިވާ ގޮތުގައި، 10 އަހަރުގެ އަބްދުލް ހަންނާނަށް ފައިސާ އަޅައިފައިވާ ދަބަސް ފެނިފައި ވަނީ އޮޓޯއަކުން ވެއްޓެނިކޮށް ކަމަށާއި، އެ ދަބަސް ހިފައިގެން އޮޓޯ ފަހަތުން ދާން މަސައްކަތް ކުރި ނަމަވެސް އޮޓޯ އަތު ނުވި ކަަމަށެވެ.
އޭގެ ފަހުން އެ ދަބަސް ހޯދުމަށް އޭގެ ވެރި ފަރާތުން އާދޭތޯ ބެލުމަށް އެ ތަނުގައި އަބްދުލް ހަންނާނާއި އޭނާގެ މަންމަ މަޑު ކުރުމަށް ފަހު ވެރި ފަރާތުން ނައުމުން، އެމީހުން ވަނީ ވެރި ފަރާތް ހޯދުމަށް އާއްމުކޮށް އިޢުލާންކޮށްފައެވެ. އާއްމު އިޢުލާނަށް ފަހު ވެރި ފަރާތަށް ފައިސާ ދަބަސް ވަނީ އަނބުރާ ހަވާލުކޮށްފައެވެ.
މިކަމުގައި އަބްދުލް ޙަންނާންގެ ފަރާތުން ފެނުނު ތެދުވެރިކަމުގެ ސަބަބުން އޭނާގެ 1 އަހަރުގެ ސްކޫލް ފީ ވެސް ވަނީ މައާފުކޮށްދީފައެވެ. އަދި ގިނަ ބަޔަކު އަންނަނީ އެ ކުއްޖާއަށް ސޯޝަލް މީޑިއާގައި ވެސް ތަޢުރީފް ކުރަމުންނެވެ.
الحمدالله