އެމްއެމްޕީއާރްސީ ޚިޔާނާތް: ނިހާނުގެ މައްޗަށް ކުރާ ދަޢުވާތަކުގެ އަޑުއެހުމެއް މާދަމާ
އެމްއެމްޕީއާރްސީގެ ޚިޔާނާތުގެ މައްސަލައިގައި ޕީޕީއެމްގެ ޕާލިމަންޓްރީ ގުރޫޕުގެ ކުރީގެ ލީޑަރު އަދި ވިލިމާލޭ ދާއިރާގެ ކުރީގެ މެންބަރު އަޙްމަދު ނިހާން ޙުސައިން މަނިކުގެ މައްޗަށް އުފުލާފައިވާ ދަޢުވާތަކުގެ އަޑުއެހުމެއް ކްރިމިނަލް ކޯޓުގައި ތާވަލުކޮށްފިއެވެ.
އެ އަޑުއެހުން އޮންނާނީ މާދަމާ 09:00 ގައެވެ.
ކުރީގެ ނައިބު ރައީސް އަޙްމަދު އަދީބު އަތުން އެކި ފަހަރު މަތިން ފައިސާ ހޯއްދަވާފައިވާކަމަށް ތުހުމަތުކުރެވޭ މައްސަލައިގައި ނިހާނުގެ މައްޗަށް ހަ ދަޢުވާއެއް އުފުލިއެވެ.
އެއީ ރިޝްވަތު ހިފުމުގެ ކުށުގެ 03 ދަޢުވާއަކާއި، މަނީ ލޯންޑްރިންގގެ ކުށުގެ ދަޢުވާއަކާއި، ރިޝްވަތު ލިބިދިނުމަށް އެދުމުގެ ކުށުގެ ދެ ދަޢުވާއެވެ. އޭގެތެރެއިން އެއް ދަޢުވާ ވަނީ އަނބުރާ ގެންގޮސްފައެވެ.
މި މައްސަލައިގެ ޝަރީޢަތް ނިމެންދެން ނުވަތަ ވަކި ގޮތެއް އަންގަންދެން ޕާސްޕޯޓު ހިފަހައްޓަން ކޯޓުން ވަނީ ނިންމާފައެވެ.
ނިހާނު ވިދާޅުވެފައިވަނީ ތަޙްޤީޤު ފެށުނު ފަހުން ރާއްޖެއިން ބޭރަށް ފުރާވަޑައިގަތުމުގެ އެއްވެސް ވިސްނުންފުޅެއް ނުގެންގުޅުއްވާ ކަމަށާއި, ދައުލަތުން ބޭނުންވާ މުއްދަތަކަށް ޕާސްޕޯޓު ހިފެހެއްޓުމުގައި ފަރުވާލެއްނެތް ކަމަށެވެ.
