ރަޝީދުގެ މަރާ ގުޅިގެން ޖަމީލް: ޙަމީދާއި ޢިމްރާން ފުލުހުންގެ މުއައްސަސާ މުޅިން ފެއިލްކޮށްލައިފި
ފުލުހުންގެ ބެލުމުގެ ދަށުގައި ހުއްޓާ މީހަކު ނިޔާވި މައްސަލައިގައި ކުރީގެ ނައިބު ރައީސް ޑރ.މުޙައްމަދު ޖަމީލް އަޙްމަދު ފާޑުވިދާޅުވެއްޖެއެވެ.
މަސްތުވާތަކެތީގެ އޮޕަރޭޝަނެއްގައި ގދ.ހޯޑެއްދޫން އިއްޔެ ހައްޔަރުކުރީ އެ ރަށު ޕީޕީއެމްގެ ސްޓިއަރިންގ ކޮމިޓީގެ ރައީސް ޢަބްދުﷲ ރަޝީދު (މާޓީ) އެވެ. ރަޝީދު ފުލުހުންގެ ބެލުމުގެ ދަށުގައި ހުއްޓާ މަރުވީ އިއްޔެ މެންދުރުގެ ވަގުތެއްގައެވެ.
އޭނާގެ މެޔަށް ތަދެއް އަރައި ފިޓު ޖެހުމުގެ އަލާމާތްތަކެއް ފެނުމުން މަޑަވެލީ ސިއްހީ މަރުކަޒަށް ގެންދިޔައިރު ވެސް މަރުވެފައިވާ ކަމަށް ފުލުހުން ވަނީ ބުނެފައެވެ.
ރަޝީދުގެ މައްސަލައިގައި ފުލުހުންގެ އިހުމާލެއްވޭތޯ ބެލުމަށް ގޮވާލައްވައި ނައިފަރު ދާއިރާގެ މެންބަރު އަޙްމަދު ޝިޔާމް މިއަދު މަޖިލީހަށް ހުށަހެޅުއްވި މައްސަލަ ބޭރުކޮށްލުމާ ގުޅިގެން ޖަމީލް ވިދާޅުވީ އެމްޑީޕީއަށް މިހާރު ފުލުހުންގެ އޮޕަރޭޝަންތަކުގައި ނުވަތަ ބަންދުގައި ތިއްބާ މީހުން މަރުވުން ބަރާބަރު ކަމަކަށްވެއްޖެ ކަމަށެވެ. އަދި އެމްޑީޕީއަށް އޮތީ ގަދަޔަށް ކައިގެން މަޖާކުރުން އެކަނިތޯ ވެސް ޖަމީލް ސުވާލުކުރެއްވިއެވެ.
ޖަމީލް ވިދާޅުވީ ކޮމިޝަނަރ އޮފް ޕޮލިސް މުޙައްމަދު ޙަމީދާއި ހޯމް މިނިސްޓަރު ޢިމްރާން ފުލުހުންގެ މުއައްސަސާ މުޅިން ފެއިލްކޮށްލައިފި ކަމަށެވެ.
''މިކަން ހިންގި ފުލުހުން ސަސްޕެންޑްކޮށް، ތަޙްޤީޤް ނުކުރެވެންވީ ކީއްވެ؟'' ޖަމީލް ސުވާލު ކުރެއްވިއެވެ.
ރަޝީދުގެ މަރުގެ މައްސަލައިގައި ފުލުހުން އިހުމާލުވެފައިވާނަމަ ނުވަތަ އަނިޔާވެރި އަމަލެއް ހިންގިކަން ސާބިތުވެއްޖެނަމަ އެކަމާ ގުޅިގެން ފިޔަވަޅު އަޅުއްވަން ފަސްޖެހިވަޑައިނުގަންނަވާނެ ކަމަށް އިމްރާން ވަނީ ވިދާޅުވެފައެވެ.
Ads by STO
