ބުނާ އެއްޗެއް ހަނދާނެއް ނުހުރޭ, ދެވަނަ ދައުރެއް ދެނީ ކީއްކުރަން؟: އާޒިމް
ރައީސް އިބްރާހިމް މުޙައްމަދު ޞާލިޙަށް ދެވަނަ ދައުރެއް ދޭންވީ ކީއްވެގެންތޯ މެދު ހެންވޭރު ދާއިރާގެ މެންބަރު ޢަލީ އާޒިމް ސުވާލު ކުރައްވައިފިއެވެ.
ރައްޔިތުން މަޖިލީހުގައި މިހާރު ކުރިއަށްދާ ބަޖެޓު ބަހުސްގައި ދެއްކެވި ވާހަކައިގައި އާޒިމް ވަނީ މި ސަރުކާރަށް ވަރަށް ބޮޑަށް ފާޑުވިދާޅުވެފައެވެ. އާޒިމް ވިދާޅުވީ މިއަދު މި އޮތީ އެމްޑީޕީގެ ސަރުކާރެއް ނޫން ކަމަށާއި އެހެންނޫންނަމަ އެމްޑީޕީގެ ސިޔާސަތުތަކާ އެއްގޮތަށް ކަންކަން ކުރިއަށް ދިޔައީސް ކަމަށެވެ.
އަޅުގަނޑަކަށް މި ބަޖެޓު އެހާ ނަލައެއް ނޫން. ފެންނަނީ އެހާ ރީތިކޮށެއް ވެސް ނޫން. ވަރަށް ނުތަނަވަސް ވަރަށް ކަންބޮޑުވާ ބަޖެޓެއްގެ ގޮތުގަ އަޅުގަނޑަށް މި ބަޖެޓު ފެންނަނީ.
ހުށަހަޅާ ބަޖެޓާ އެއްގޮތަށް ކަންކަން ކުރަން ކަނޑައެޅިގެން ޤާނޫނުއަސާސީގައި އެބަ އޮތް ކަމަށާއި އޭގެ އިތުރަށް ކަންކަން ނުކުރެވޭނެ ކަމަށް ވެސް ލިޔެފައި އެބައޮތް ވެސް އާޒިމް ވިދާޅުވިއެވެ.
އެހެން ނަމަވެސް އެ ހުށަހަޅާ ބަޖެޓެއް ކޮންމެ ގޮތަކަށް ހުށަހެޅިކަމުގައި ވީ ނަމަވެސް އަޅުގަނޑުމެންގެ މެންބަރުންގެ ޒިންމާދާރުކަން ކުޑަކަމުންނޭ އަޅުގަނޑު ދަންނަވާނީ ޤާނޫނުއަސާސީއަކާ ޤާނޫނުއަސާސީއެއް ޤާނޫނަކާއި ޤާނޫނެއް އެ މީހަކު ބޭނުން ގޮތަކަށް ބަޖެޓު ޚަރަދު ކުރަމުން ބޭނުން އައިޓަމަކުން ކަންކަން އެއް އައިޓަމުން ނަގާ އަނެއް އައިޓަމަށް ލައި މި މަސައްކަތް ކުރަމުން މިދަނީ.
އާޒިމް ވިދާޅުވީ ބަޖެޓުގައި މާލޭ ރައްޔިތުންނަށް ހިތްހަމަ ޖެހޭނެ ކަންތައްތަކެއް ހުށަހަޅާފައެއް ނެތް ކަމަށެވެ. މާލޭގެ ރައްޔިތުން ބޭނުންވަނީ ތޮއްޖެހިފައި މި އޮތް އޮތުމުން ސަލާމަތްވާން ކަމަށާއި އެ ކަންތައްތަކަށް ސިޔާސަތުތަކެއް ރާވައި އެ ކަންކަމަށް ޚަރަދު ކުރަން ކަމަށެވެ. ބިދޭސީންގެ މައްސަލަ ވެސް ހައްލު ނުވާ ކަމަށާއި މާލޭގެ ރައްޔިތުންނަށް އަމިއްލަ ގެއިން ވަދެ ނިކުމެވޭނެ ފަސޭހަ ގޮތެއް އަދި މަގުތަކުގައި އަމާންއޮމާންކަމާއެކު ހިނގާބިނގާ އުޅެވޭނެ ގޮތެއް ވެސް ނެތް ކަމަށެވެ.
ދަޢުލަތަކަށް އެންމެ ގިނަ ފައިސާ ލިބޭ އެއް ގޮތަކީ ރައްޔިތުންގެ އަތުން ޓެކްސް ފައިސާ ނެގުންކަމަށް އާޒިމް ވިދާޅުވިއެވެ. އަދި ޓެކްސްތައް ތަޢާރަފުކޮށް ޓެކްސް ބޮޑުކުރަނީ ރައްޔިތުންނަށް ރަނގަޅު ޚިދުމަތެއް ދިނުމުގެ ނަމުގައި ކަމަށް ވެސް އޭނާ ވިދާޅުވިއެވެ.
އަޅުގަނޑުގެ ސުވާލަކީ ރައްކާތެރި އަމާން މާހައުލެއް މި ރާއްޖޭގެ ރައްޔިތުންނަށް ގާއިމުކޮށްދެވިއްޖެތޯއޭ. ރަނގަޅު ސިއްހީ ފަރުވާދޭ ނިޒާމެއް އަޅުގަނޑުމެންގެ ރައްޔިތުންނަށް ގާއިމުކޮށްދެވިއްޖެތޯއޭ. ކޮރަޕްޝަންގެ އަމަލުތައް އެއް ދުވަހުން އަނެއް ދުވަހަށް ކުޑަވެގެން އެބަދޭތޯއޭ.
އަދި އޭގެ ނަތީޖާއެއް ނުފެންނަ ކަމަށާއި ފޭރުމާއި ވައްކަމާއި ޓެކުމާއި މާރާމާރީ އިންތިހާއަށް އިތުރުވަމުންދާއިރު އެ ކަންކަން ހައްލުކުރަން ކުރެވުނީ ކޮންކަމެއްތޯ ވެސް އާޒިމް ސުވާލު ކުރެއްވިއެވެ.
ފަސް އަހަރު ނިމެންދާކަން ފާހަގަކުރައްވައި އާޒިމް އިތުރަށް ވިދާޅުވީ ވައްކަމާއި މާރާމާރީގެ ބޮޑެތި މައްސަލަތައް ފުލުހަށް ހުށަހެޅި ނަމަވެސް އެފަދަ މައްސަލަތައް ނުބެލޭ ކަމަށާއި
ކޯޓަށް މައްސަލައެއް ލައިފިއްޔާ ނިމެނީ ފަސް ވަރަކަށް އަހަރުން ކަމަށެވެ. އަދި ޤާނޫނީ ދައުލަތެއް ހިނގާތަނެއް ނުފެންނަ ކަމަށާއި ފެންނަނީ އިރުއިރުކޮޅާ ސަރުކާރުގެ ސްޓޭންޑް ބަދަލުކުރާ ތަން ކަމަށް ވެސް އާޒިމް ވިދާޅުވިއެވެ.
ސަރުކާރު ހިންގަން ތިބި ފަރާތްތަކުން އެބަ ބުނޭ ތިމަންނާމެންނަށް އިތުރު ދައުރެއް ދޭށޭ. ހަމައެއާއެކު މި ބަޖެޓު ފޮތަށް ބަލައިލީމަ އަޅުގަނޑަށް ފެނިގެންދަނީ މަލާމާތް ކުރާ ތަން. މި ބަޖެޓު ފޮތަށް ބަލައިލާއިރު އެ މީހުން ބުނާ ކަހަލަ ތިމަންނާމެން ދެން އަންނަ ފަސް އަހަރު ވެރިކަން ކުރާނީ މާލޭ މީހުންނާ ނުލައޭ. ތިމަންނާމެން ދެން އަންނަ ފަސް އަހަރު ވެރިކަން ކުރާނީ އައްޑޫ މީހުންނާ ނުލައޭ. ތިމަންނާމެން ދެން އަންނަ ފަސް އަހަރު ވެރިކަން ކުރާނީ ކުދި އަދި މެދު ފަންތީގެ ވިޔަފާރިވެރިންނާ ނުލައޭ.
އާޒިމް ވިދާޅުވީ ''ބަހަކާއި އަމަލަކާ ހަމަ އެއްގޮތަކަށް ވެސް ދިމާވާ ތަނެއް އަޅުގަނޑަކަށް ނުފެނޭ'' ކަމަށެވެ.
ބަހާއި ޢަމަލެއް ދިމައެއް ނުވޭ. ދައްކާ ވާހަކަ ދެކޮޅެއް ނުޖެހޭ. ބުނާ އެއްޗެއް ހަނދާނެއް ނުހުރޭ. އަމިއްލަ ދުލުން ނުކުންނަ ބަހެއްގެ އިތުބާރެއް ނެތް. ދެން އަޅުގަނޑުމެން ކިހިނެއްތޯ ދެވަނަ ދައުރެއް ދޭނީ.
ރިޔާސަތުން ބެލް ޖެއްސެވި ފަހުން އާޒިމްގެ ވާހަކަ އިތުރުކޮށްލައްވައި ވިދާޅުވިއެވެ.
އިންސާނުންތަކެއް މިގައުމުގައި ހަނާވެ ރޯފިލައިގެން އުޅޭއިރުވެސް ކަލޭގެ ތި އަނގަގަނޑުން ތިނޫން އެއްޗެއް ނުކިޔާތި!