ޔާމީނަށް ހުކުމް އިއްވުން އާދިއްތަ ދުވަހު
އިދިކޮޅު ޕީޕީއެމްގެ ރައީސް އަދި ކުރީގެ ރައީސް ޔާމީން ޢަބްދުލްޤައްޔޫމްގެ މައްޗަށް ދައުލަތުން ދަޢުވާކުރާ ވ.އާރަށުގެ މައްސަލައިގައި ޙުކުމްކުރުން އަންނަ އާދިއްތަ ދުވަހަށް ތާވަލުކޮށްފިއެވެ.
އާރަށު މައްސަލައިގައި ރައީސް ޔާމީނުގެ މައްޗަށް ދެދަޢުވާއެއް އުފުލާފައިވެއެވެ. އެއީ މަނީ ލޯންޑަރިންގ އަދި ރިޝްވަތު ގަބޫލުކުރުމުގެ ކުށުގެ ދަޢުވާއެވެ.
މި މައްސަލައިގައި ދެން ދަޢުވާ އުފުލާފައިވަނީ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެންބަރު ޔޫސުފް ނަޢީމްގެ މައްޗަށެވެ. އޭނާގެ މައްޗަށް އުފުލާފައިވަނީ ރިޝްވަތު ދިނުމުގެ ކުށުގެ ދަޢުވާއެވެ.
މި މައްސަލައިގެ ޚުލާސާ ބަޔާން އިއްވައި އަޑުއެހުންތައް ނިންމައިލީ މިދިޔަ މަހުގެ 30 ވަނަ ދުވަހުއެވެ.
އެ ދުވަހު ކްރިމިނަލް ކޯޓުގެ އިސް ގާޒީ އަޙްމަދު ޝަކީލް ވިދާޅުވީ ޖިނާއީ އިޖުރާޢަތުގެ ގަވާއިދުގެ ދަށުން ޙުކުމްކުރަން އޮންނަ މުއްދަތުގައި ޙުކުމް ކުރައްވާނެ ކަމަށެވެ. ޚުލާސާ ބަޔާން އިއްވަވާތާ 30 ދުވަހުގެތެރޭގައި ޙުކުމްކުރަން ޖިނާއީ އިޖުރާޢަތުގެ ގަވާއިދުގައި ބަޔާން ކޮށްފައިވެއެވެ.
ޙުކުމް ކުރުމަށް ބާއްވާ އަޑުއެހުން އަންނަ އާދިއްތަ ދުވަހު ހެނދުނު 09:00 އަށް ކްރިމިނަލް ކޯޓުން ވަނީ ތާވަލުކޮށްފައެވެ.
ރޔާމީނަށް ނަސްރާ ކާމިޔާބު މިނވަރު ކުރައްވާށި، އާމީން.
امين