ޕީޕީއެމް-ޕީއެންސީން ދީން ހަތިޔާރަކަށް ނުހަދާނެ: ޝުޖާޢު

ސަރުކާރާއެކުގައި ކޯލިޝަން ހަދައިގެން ތިބި، ދީން ހަތިޔާރަކަށް ހަދައިގެން އުޅޭ ސިޔާސީ ޕާޓީތަކަށް މަސާޖު ޕާލަރތައް ހިންގުންވެސް "އޯކޭ" ކަމަށް ޕީއެންސީގެ ނައިބު ރައީސް އިބްރާހީމް ޝުޖާޢު ވިދާޅުވެއްޖެއެވެ.
ރައީސް ޔާމީން އަބްދުލްޤައްޔޫމަށް 2023 ވަނަ އަހަރުގެ ރިޔާސީ އިންތިޚާބު ކާމިޔާބު ކޮށްދިނުމަަށް މަސައްކަތް ކުރުމަށް، އިދިކޮޅު ފަރާތްތަކުން މިއަދު ފެށި "ހޯޕް ކޮންފަރެންސް"ގައި ވާހަކަ ދައްވަމުން ޝުޖާޢު ވިދާޅުވީ ޕީޕީއެމް-ޕީއެންސީގެ ކޯލިޝަނުން އިސްލާމްދީނުގެ އެންމެހައި އަސާސްތައް ހިމާޔަތް ކުރާނެ ކަަމަށެވެ.
އަދި އެއްވެސް ވަރަކަށް ހަރުކަށި ކަމަކަށް، އެ ކޯލިޝަނުން ތާއީދު ނުކުރާކަން ފާހަގަކުރައްވައި، އިދިކޮޅުން، އިސްލާމްދީން ހަތިޔާރަކަށްވެސް ނުހަދާނެ ކަމަށް ޝުޖާޢު ވިދާޅުވިއެވެ. އޭނާ ވިދާޅުވީ ދީން ހަތިޔާރަކަށް ހަދައިގެން އުޅޭ ސިޔާސީ ޕާޓީތަކަށް މާލޭގައި މަސާޖު ޕާލަރ ހިންގުން ފަދަ ކަންކަންވެސް "އޯކޭ" ކަމަށެވެ.
"އަޅުގަނޑުމެންނަކީ އެއްގޮތަކަށްވެސް ހަރުކަށި އުސޫލުތަކަށް ތަބާވާ ޕާޓީއެއް ނޫން. އަޅުގަނޑުމެންނަކީ އަބަދުވެސް، އިސްލާމްދީނުގެ މެދުމިނުގެ އުސޫލުތައް ގަބޫލުކުރާ، ވަރަށް މެދުމިނުގަ ސިޔާސަތުތަކަށް ތާއީދު ކުރާ ޕާޓީއެއް. އެހެންނަމަވެސް އަޅުގަނޑުމެންގެ ބަހާ އަމަލާ ދިމާވާނެ. މިހާރު، މި ސަރުކާރު ތެރޭގައި، ކޯލިޝަން ހައްދަވައިގެން އެބަތިބި ދީނީ ޕާޓީތައް. އެމީހުން ދީން ގާތް ކަަމަށް ބުނާނެ. އެކަމަކު އެމީހުންނަށް އޯކޭ ވާނެ، މަސާޖު ޕާލަރތައް މާލޭގައި ހެދިޔަސް."ޝުޖާޢުއާ އެކުގައި މި މައުޟޫއުއަށް ވާހަކަ ދައްކަވަމުން ޕީޕީއެމްގެ ނައިބު ރައީސް އަޙްމަދު ޝިޔާމް ވިދާޅުވީ ދީން ހަތިޔާރަކަށް ހަދައިގެން އިދިކޮޅުން އެއްވެސް އިރެއްގައި މަސައްކަތް ނުކުރާ ކަމަށާއި، މިސްކިތްތަކަށް ޤަޟާހާޖާ ކުރާއިރުވެސް، ދީން ހިމާޔަތް ކުރާ ކަމަށް ބުނާ ޕާޓީތަކަށް އޯކޭ ކަމަށެވެ. ނަމަވެސް، ޕީޕީއެމް-ޕީއެންސީން މަސައްކަތް ކުރަނީ، އިސްލާމްދީނުގެ އަސާސްތައް ހިމާޔަތްކުރަންޖެހޭކަން ޤަބޫލުކޮށްގެން ކަމަށެވެ. ރައީސް ޔާމީންގެ ވެރިކަމުގައި، އިސްލާމްދީން ހިމާޔަތް ކުރުމަށް ކޮށްފައިވާ ގިނަ ގުނަ މަސައްކަތްތަކަށް އަލިިއަޅުވައިލައްވައި، އިސްލާމިކް ޔުނިވަރިސޓީއެއް އޭރު އުފެއްދެވިކަންވެސް ޝިޔާމް ފާހަގަކުރެއްވިއެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.