އެމްއެމްޕީއާރްސީގެ ޚިޔާނާތާއި ގޮތްނޭނގޭ މަރުތަކުގެ މައްސަލާގައި ގާއިމްކުރެވުނު އިންސާފެއްނެތް: އަލީ ވަހީދު

އެމްއެމްޕީއާރްސީގެ ޚިޔާނާތާއި ގޮތްނޭނގޭ މަރުތަކުގެ މައްސަލާގައި ގާއިމްކުރެވުނު އިންސާފެއްނެތްކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމްގެ އިންތިހާބީ އެޖެންޓް އަދި ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
އަލީ ވަހީދު މިހެން ވިދާޅުވީ ކުރިއަށް އޮތް ރިޔާސީ އިންތިޚާބުގެ ކެމްޕޭނަށް ރަށްރަށަށް ކުރައްވާ ދަތުރުފުޅުތަކުގެ ތެރެއިން އދ. ދަގެއްޗަށް ވަޑައިގެން ބޭއްވި ބައްދަލުވުމެއްގައި ވާހަކަފުޅު ދައްކަވަމުންނެވެ. އެގޮތުން، އެމްއެމްޕީއާރްސީގެ ޚިޔާނާތުގެ މައްސަލައާއި ގޮތްނޭނގޭ މަރުތަކުގެ އިންސާފު ގާއިމްކޮށްދޭނެކަމަށް ބުނެ ވެރިކަމަށް އައިސް ގާއިމްކުރެވުނު އިންސާފަކީ ކޮބައިތޯ އެބޭފުޅާ ވަނީ ސުވާލުއުފައްދަވާފައެވެ.
އަދި އެމްއެމްޕީއާރްސީގެ ޚިޔާނާތުގައި ރައީސް ޔާމީން އެކަނި ޖަލަށްލާ، އެމްޑީޕީގެ ތެރެއިން އެފައިސާ ލިބުނުމީހުންނާއި، އެޚިޔާނާތުގައި ބައިވެރިވި މީހުންގެ ލިސްޓްތައް ބަދަލުކޮށް ވަކިބަޔަކު އެމައްސަލައިން ރެކި ފިލުމަކީ އިންސާފެއް ނޫންކަމަށާއި ގައުމުގެ ވެރިކަން ބޮއްސުންލާ ހުރިހާ ދިމާލަކުން ރައްޔިތުންނާއި ދިމާލަށް ލޮއްސިތައް އަމާޒުވެފައިވާ ދަނޑިވަޅެއްގައި ނުބައި ވެރިޔަކު ވެރިއަކަށް ގެނެވިއްޖެނަމަ ގައުމަށާއި ރައްޔިތުންނަށް ލިބޭ ގެއްލުން އިންތިހާއަށް ބޮޑުވާނެ ކަމަށެވެ.
މީގެ އިތުރުން، މިއީ ގާސިމްފަދަ އިޚްލާސްތެރި ދީލަތި ބޭފުޅަކަށް ފުރުޞަތެ ދެއްވަންވީ ވަގުތު ކަމަށާއި އިސްލާމްދީނަށާއި ދިވެހި މިނިވަންކަމަށާއި ދިވެހި ރައްޔިތުންނަށް އެންމެ ބޮޑު ހިދުމަތެއް ކޮށްދެއްވި ލީޑަރަކީ ގާސިމް ކަމަށް އަލީ ވަހީދު ވިދާޅުވިއެވެ.
ހަމައެއާއެކު ދިވެހި ވެރިކަމަށް މިފަދަ ދަނޑިވަޅެއްގައި އެންމެ ގާބިލް ވެރިއަކީ ގާސިމް ކަމަށްވެސް އަލީ ވަހީދު ވިދާޅުވިއެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.