ޔަތީމު ކުދިންނަށް ޒަކާތު ހައުސްއިން މާލީ އެހީ ހަމަޖައްސަނީ

ޒަކާތު ހައުސް މެދުވެރިކޮށް ޔަތީމު ކުދިންނަށް މާލީ އެހީ ލިބޭނެ ނިޒާމެއް ހަމަޖެއްސުމުގެ މަސައްކަތް ކުރަމުންދާ ކަމަށް އިސްލާމިކް މިނިސްޓްރީން ހާމަކޮށްފިއެވެ.
އެކަން ހާމަކުރެއްވި މިއަދު 'އެކްސް' ގައި ކުރެއްވި ޕޯސްޓެއް މެދުވެރިކޮށް، މިނިސްޓަރު ޑރ ޝަހީމް އަލީ ސައީދުއެވެ.
ޝަހީމް ވިދާޅުވީ، އެ ނިޒާމުގެ ދަށުން ޔަތީމު ކުދިން ބޮޑު ވަންދެން ކޮންމެ އަހަރަކު ޒަކާތް ހައުސް މެދުވެރިކޮށް އެކުދިންނަށް ބޭނުންވާ އެހީތެރިކަން ލިބިގެންދާނެ ކަމަށެވެ. އެކަމާއި ގުޅޭ އިތުރު ތަފްސީލެއް މިނިސްޓަރު ނުދެއްވައެވެ.
ރައީސް ޑރ. މުހައްމަދު މުއިއްޒުގެ މެނިފެސްޓޯގައި ހިމަނުއްވާފައިވާ ''ޒަކާތު ހައުސް'' އަކީ އިސްލާމީ ޝަރީއަތުގެ އަލީގައި، ޒަމާނީ ޓެކްނޮލޮޖީގެ ބޭނުން ހިފައިގެން ގާއިމްކުރެވޭ ޒަކާތާއި ސަދަގާތުގެ އަދުލުވެރި އަދި ދެފުށް ފެންނަ ނިޒާމެއްގެ ތެރެއިން، ޒަކާތް ނެގުމާއި އޭގެ ބެހެނިވެރިންނަށް ފޯރުކޮށްދިނުމާއި ފުދުންތެރި މުޖުތަމައެއް ބިނާކުރުމުގެ ދަށުން އެކުލަވާލެވިފައިވާ އިދާރާއެކެވެ.
އެ އިދާރާ ގާއިމުކުރުމުގެ ބޭނުމަކީ ޒަކާތުގެ ނަފާ އޭގެ ބެހެނިވެރިންނަށް ފުޅާ ދާއިރާއެއްގައި ލިބޭނެގޮތަށް ޒަކާތު ފަންޑު ތަރައްގީކޮށް އެ ނިޒާމު ހަރުދަނާ ކުރުމުގެ ބޭނުމުގައެވެ. އެ ފަންޑަށް ޖަމާވާ ފައިސާ މެދުވެރިކޮށް ރާއްޖޭގައި ތިބި ފަގީރުންނާއި ޔަތީމުންނަށް މެދު ކެނޑުމެއްނެތި ޚަރަދުކުރުމުގެ މަސައްކަތް މިހާރު ވަނީ ފެށިފައިއެވެ.
މި ފަންޑު އެކުލަވާކުމަށް ފަހު އެ އިދާރާއިން ވަނީ އެހީގެ ގޮތުގައި ފެބްރުއަރީ މަހު 700،000 އަށް ވުރެ ގިނަ ރުފިޔާ ދީފައިއެވެ.
އަދި އޭގެ ފަހުވެސް އެކި ކަންކަމުގައި އެހީގެ ގޮތުގައި ޒަކާތް ހައުސްއިން އަންނަނީ އެހީ ފޯރުކޮށްދެމުންނެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.