70 ޕަސެންޓަކީ ކޯޓުން ބޭރުން ހައްލުކުރެވޭހާ ކުދި މައްސަލަތައް: ފަނޑިޔާރު ސުއޫދު
ޝަރީއަތަށް ހުށަހަޅާ މައްސަލަތަކުގެ 70 ޕަސެންޓު މައްސަލަތަކަކީ ކޯޓުން ބޭރުން ހައްލުކުރެވޭނެ ވަރުގެ ކުދި މައްސަލަތަކެއް ކަމަށް ސުޕްރީމް ކޯޓުގެ ފަނޑިޔާރު ހުސްނުއްސުއޫދު ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި މިއަދު ވިދާޅުވެއްޖެ އެވެ.
ޖުޑިޝަރީ ކޮމިޓީއަށް ބައެއް ފަނޑިޔާރުން މިއަދު ހާޒިރުކުރީ ޝަރީއަތްތައް ލަސްވާ ސަބަބާއި ޖިނާއީ އިޖުރާއަތާއި މަދަނީ އިޖުރާއަތްތައް ބަޔާންކުރާ ގާނޫނުތަކަށް އިސްލާހު ގެނައުމާ ގުޅޭ ގޮތުން ފަނޑިޔާރުންގެ ހިޔާލު ހޯދުމަށެވެ.
ސުޕްރީމް ކޯޓުގެ ފަނޑިޔާރު ސުއޫދު ވިދާޅުވީ ކޯޓުތަކަށް ހުށަހެޅޭ މައްސަލަތަކުގެ ތެރެއިން މަދަނީ މައްސަލަތަކަކީ ފަނޑިޔާރުން ކުޑަ ހިތްވަރަކާއެކު މަސައްކަތް ކޮށްފިނަމަ ޖާގައިގެ ދަތިކަން އޮތް ނަމަވެސް އަވަަހަށް ފައިސަލާ ކުރެވޭނެ މައްސަލަތަކެއް ކަމަށެވެ.
ފަނޑިޔާރު ވިދާޅުވި ގޮތުގައި ސިވިލް ކޯޓަށް ހުށަހެޅޭ މައްސަލަތަކުގެ ތެރެއިން ހަގީގަތުގައި ޝަރީއަތަށް ކޮންމެހެން ގޮސްގެން ގޮތެއް ނިންމާ ވަރުގެ މައްސަލަތައް އުޅެނީ 10 ޕަސެންޓުގަ އެވެ. ގިނައީ ވަރަށް ވެސް ކުދި މައްސަލަތައް ކަމަށް އޭނާ ވިދާޅުވި އެވެ.
މަދަނީ މައްސަލަތަކުގެ 90 ޕަސެންޓަކީ ކުދި މައްސަލަތައް ކަން ފާހަގަ ކުރެއްވުމަށް ފަހު ފަނޑިޔާރު ސުއޫދު ވިދާޅުވީ އެއީ މުޅި ޖުޑިޝަރީގެ ތެރޭގައި ހިމެނޭ މައްސަލަތަކުގެ ވެސް ގާތްގަނޑަކަށް 70 ޕަސެންޓު މައްސަލަ ކަމަށެވެ.
"މި މައްސަލަތަކަކީ މުޅި ކޯޓުގެ ސިސްޓަމުގެ ތެރޭ ހިމެނޭ މައްސަލަތަކުގެ 60 ޓު 70 ޕަސެންޓު މިއީ ކުދި މައްސަލަތައް، މި މައްސަލަތައް މީޑިއޭޝަނުގެ ތެރެއިން އަޅުގަނޑުމެން ހައްލު ކުރެވޭނެ ސިވިލް ޕްރޮސީޖާގެ ގާނޫނަށް ގެނެވޭ ކުޑަކުޑަ އިސްލާހަކުން،" ފަނޑިޔާރު ސުއޫދު ވިދާޅުވި އެވެ.
ފަނޑިޔާރު ސުއޫދު ވިދާޅުވި ގޮތުގައި ކޯޓުތަކުގެ ޖާގައިގެ މައްސަލައަކީ މައްސަލައިގެ 50 ޕަސެންޓު ކަމަށެވެ. މައްސަލައިގެ ދެން ހިމެނޭ ބޮޑު ބަޔަކީ މި ގޮތަށް ހުރި މައްސަލަތައް އަވަހަށް ނިންމޭނެ މެކޭނިޒަމެއް މަދަނީ އިޖުރާއަތުގައި ކަނޑައެޅިފައި ނެތުމެވެ.
