ތިނަދޫގައި ހުންނަ ދާރުލްއާސާރުން ބައެއްތަކެތި ވަގަށް ނަގައިފި
ރޭގެ ވަގުތެއްގައި ގދ.ތިނަދޫގައި ހުންނަ ހުވަދޫ ސަރަހައްދީ ދާރުލްއާސާރަށް ބަޔަކު ވަދެ އެތަނުގައި ހުރި ބައެއް ތަކެތި ވަގަށް ގެންގޮސްފިއެވެ.
މިނިސްޓްރީ އޮފް ހެރިޓޭޖުން މިކަން ވަނީ ޔަގީން ކޮށްދީފައެވެ.
ތިނަދޫގައި ހުންނަ ދާރުލްއާސާރުގައި ހުރި ބައެއް ތަކެތި ވަގަށް ގެންގޮސްފައި ވާތީ ސަގާފީ ތަރިކަ ރައްކާތެރިކުރާ ގައުމީ މަރުކަޒުން ވަނީ އެ މައްސަލަ ފުލުހަށް ހުށަހަޅާފައެވެ. އަދި އެކަމާ ގުޅިގެން ފުލުހުން ހަރަކާތްތެރި ވަމުންދާ ކަމަށް މައުލޫމާތު ލިބެއެވެ.
ފުލުހުން ބުނެފައިވަނީ މި މައްސަލަ ފުލުހަށް ހުށަހަޅާފައިވަނި ރޭ 21:40 އެހާކަށްހާއިރު ކަމަށެވެ. އަދި މިހާތަނަށް ފުލުހުން ކުރި މަސައްކަތުން ގެއެއް ބަލައި ފާސްކޮށް ބައެއް ތަކެތި ހޯދިފައިވާ ކަމަށެވެ. އެގޮތުން ކޮމްޕިއުޓާ ސިސްޓަމްގެ ސިސްޓަމް ޔުނިޓަކާއި ކީބޯޑަކާއި މައުސް އެއް ހޯދިފައިވާ ކަމަށް މައުލޫމާތު ދެއެވެ.
މި މައްސަލައާއި ގުޅިގެން ފުލުހުން އަދި މީހަކު ހައްޔަރު ކޮށްފައެއް ނުވެއެވެ. އަދިވެސް މި މައްސަލަ އިތުރަށް ބަލަމުންދާ ކަމަށް ފުލުހުން ބުނެއެވެ.
