އެސްޓީއޯއިން އެސްޑީ ބަޔޯސެންސަ ލެބް އިކުއިޕްމެންޓް ތައާރަފުކޮށްފި
އެސްޓީއޯ މެޑިކަލް ސާވިސަސްއިން ރާއްޖެއަށް އެސްޑީ ބަޔޯސެންސަ ލެބް އިކުއިޕްމެންޓް ތައާރަފުކޮށްފި އެވެ.
އަންގާރަ ދުވަހުގެ ރޭ ލޮނުޒިޔާރަތް ޕާކުގައި ބޭއްވި ހަފުލާއެއްގައި މި އާ އިކުއިޕްމެންޓްސް ތައާރަފު ކޮށްދެއްވާފައި ވަނީ ހެލްތު މިނިސްޓްރީގެ ސްޓޭޓް މިނިސްޓަރު އާމިނަތު ޝިރުނާ އެވެ.
އަލަށް ތައާރަފު ކުރެވިފައިވާ އިކުއިޕްމެންޓްތަކުން ވަގުތުން ނަތީޖާ ލިބޭ ޕޮއިންޓް އެފް ކެއަ ޓެސްޓުތައް ހެދޭނެ އެވެ. މި ވަސީލަތްތަކަކީ ބޮޑެތި ހޮސްޕިޓަލުތަކާއި ހެލްތު ސެންޓަރުތަކުން ފެށިގެން ކްލިނިކްތަކާއި ހަމައަށް ވަރަށް ބޭނުންތެރި ފަސޭހަ، އަވަސް އަދި އިތުބާރު ކުރެވޭނެ ނަތީޖާ ނެރެދޭނެ ވަސީލަތްތަކެކެވެ. އަލަށް ތައާރަފު ކުރެވުނު އިކްއިޕްޓްތަކުން ހެދޭ ގިނަ ޓެސްޓުތަކަކީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ޕްރީކޮލިފައިވެފައިވާ ޓެސްޓުތަކެއްކަން ފާހަގަކޮށްލެވެ އެވެ.
ހެލްތު މިނިސްޓްރީ، އެޗްޕީއޭ އަދި އެހެނިހެން މައި ސިއްހީ އިދާރާތަކުންނާއި ހޮސްޕިޓަލު އަދި ކްލިނިކްތަކުން ހާޒިރުވި މި ހަފުލާގައި އެސްޓީއޯއިން އަލަށް ތައާރަފުކުރި ވަސީލަތްތައް ހާޒިރީންނަށް ދައްކާލާ އަދި ތަޖުރިބާ ކޮށްލުމުގެ ފުރުސަތު ވަނީ ދީފަ އެވެ.
ދެން ތައާރަފު ކޮށްފައި ވަނީ އެމް 10 މެޝިން އެވެ. މި މެޝިނުން ޑެންގޫ، ޓީބީ، ފުއްޕާމޭގެ ބަލިތައް، އެސްޓީއައި އަދި އެޗްޕީވީ ޓެސްޓް ހެދޭނެ އެވެ.
އެސްޑީ ބަޔޯސެންސަރަކީ ސައުތް ކޮރެއާއަށް ނިސްބަތްވާ ކުންފުންޏެކެވެ. މި ކުންފުންޏަކީ ޑައިގްނޯސްޓިކް ވަސީލަތްތައް އުފެއްދުމުގައި ދުނިޔޭގެ ފެންވަރުގައި ފާހަގަކޮށްލެވޭ ކުންފުންޏެކެވެ. މިގޮތުން މި ކުންފުނީގެ ޑައިގްނޯސްޓިކް ވަސީލަތްތަކަކީ ދުނިޔޭގެ އެކި ކަންކޮޅުތަކުގެ ސިއްހީ ދާއިރާގައި ބޭނުން ކުރެވޭ ކޮލިޓީ ރަނގަޅު އިތުބާރުހިފޭ މޮޅު އުފެއްދުންތަކެކެވެ.
