ކަލައިދޫ ގައި ވަޅުލާފައި ހުރި 352،300 ރުފިޔާ ފުލުހުން ހޯދައިފި
މިމަހުގެ 6 ވަނަ ދުވަހު ލ. ކަލައިދޫ ގެއަކުން ގިނަ އަދަދެއްގެ ފައިސާ ވަގަށް ނަގާފައިވާ ކަމަށް ބުނެ ފުލުހުންނަށް ހުށަހެޅި މައްސަލައަކާ ގުޅިގެން، ފުލުހުން ކުރިއަށް ގެންދިޔަ އޮޕަރޭޝަނެއްގައި އެ ފައިސާތައް ހޯދައިފިއެވެ.
އެގޮތުން އިސްދޫ ޕޮލިސް ސްޓޭޝަނާއި، ލ. ގަން ޕޮލިސް ސްޓޭޝަން އަދި ފުލުހުންގެ އިންޓެލިޖެންސް ގުޅިގެން ހިންގި އެ އެޕަރޭޝަނުގައި، އެ ފައިސާތައް ހޯދާފައިވަނީ ރަށުތެރޭގައި ވަޅުލާފައިހުއްޓައި ކަމަށް ފުލުހުން މައުލޫމާތު ދެއެވެ.
ފުލުހުންގެ އިންޓެލިޖެންސަށް ލިބުން މައުލޫމާތަކާއި ގުޅިގެން ރޭ ދަންވަރު އެ ސަރަހައްދު ބަލައި ފާސްކޮށް 352،500 ރުފިޔާ ފުލުހުން ވަނީ ހޯދާފައެވެ.
މި މައްސަލައާ ގުޅިގެން 29 އަހަރުގެ މީހަކާއި 38 އަހަރުގެ މީހަކު، ކޯޓު އަމުރެއްގެ ދަށުން ހައްޔަރުކޮށް މައްސަލަދަނީ އިތުރަށް ތަހުގީގު ކުރަމުންނެވެ.
ގޭގެއަަށް ވަދެ މީހުންގެ އަގު ބޮޑެތި މުދަލާއި ގިނަ އަދަދަކަށް ފައިސާ ވަގަށް ނެގުމަކީ މިހާރު އަނެއްކާވެސް އާއްމުވަމުން އަންނަ މައްސަލައެކެވެ.
މިފަދަ ހިތާމަވެރި ހާދިސާތައް ހިނގުމުން މެދުވެރިވިޔަ ނުދިނުމަށްޓަކައި، ގޭއާއި މުދަލާއި ފައިސާ އަދި އަމިއްލަ ނަފްސުވެސް ރައްކާތެރި ކުރުމަށް ފުލުހުން ވަނީ މީގެ ކުރިން ވެސް ނަސޭޙަތްތެރި ވެފައެވެ.
