Sunday, 22 November 2026
Advertisement
Allied Insurance (leaderboard)
ރައްޔިތުންގެ މަޖިލިސް

ޕީޖީ ޝަމީމް ހާޒިރުކުރި ކޮމިޓީ ސިއްރުކޮށްފި

ޕީޖީ ޝަމީމް ހާޒިރުކުރި ކޮމިޓީ ސިއްރުކޮށްފި
ޕްރޮސެކިއުޓަ ޖެނެރަލް (ޕީޖީ) ގެ މަގާމުން ހުސައިން ޝަމީމް ވަކިކުރުމަށް ހުށަހަޅާފައިވާ މައްސަލައިގައި  މިއަދު އޭނާ ހާޒިރުކުރި ރައްޔިތުންގެ މަޖިލީހުގެ ޖުޑިޝަރީ ކޮމިޓީގެ ބައްދަލުވުން ސިއްރުކޮށްފި އެވެ. ޝަމީމް ވަކިކުރަން އެ ކޮމިޓީއަށް ހުށަހެޅުއްވީ ހުޅުދޫ ދާއިރާގެ ކޮންގްރެސް ޕާޓީގެ މެމްބަރު މުހައްމަދު ޝާހިދު (ޝާޑު) އެވެ. ކޮމިޓީން ނިންމާފައި ވަނީ ޝަމީމަށް ފަސް ދުވަހުގެ މުއްދަތެއް ދިނުމަށެވެ. އަދި އެއަށްފަހު ލިޔެކިޔުންތަކާ އެކު ކޮމިޓީއަށް ހާޒިރުވާން އަންގާށެވެ. ހެނދުނު 10:30 އަށް ތާވަލުކޮށްފައިވާ ކޮމިޓީ އާންމުންނަށް ހުޅުވާލައިގެން ކުރިއަށް ގެންދިއުމަށް ޝަމީމް އެދިވަޑައިގެންނެވި އެވެ. އެކަމަކު ކޮމިޓީ ބައްދަލުވުން ފެށުމާ އެކު ތުލުސްދޫ ދާއިރާގެ ކޮންގްރެސް ޕާޓީ މެންބަރު އިބްރާހިމް ނަސީމް ހުށަހެޅުއްވީ ކޮމިޓީ ސިއްރުކޮށްގެން ކުރިއަށް ގެންދިޔުމަށެވެ. ސަބަބެއް ކަމަށް ވިދާޅުވީ ޝަމީމަށް ތުހުމަތު ކުރެވެނީ ހައްސާސް މައްސަލައަކަށްވުމުގެ އިތުރުން ގިނަ ބައެއް ޒާތީ މައުލޫމާތުތަކެއް ހިމެނޭ މައްސަލަތަކަށް ވާތީ އެވެ. އަދި މީގެ ކުރިން ބޭއްވި ބައްދަލުވުމުގައި ވެސް ކޮމިޓީ ސިއްރުކޮށްގެން ކުރިއަށް ގެންދަން ބޭނުންވެ ވަޑައިގަންނަވާ ކަމަށް ޝަމީމް ވިދާޅުވެފައިވާތީ އެވެ.
"މިއަދު އަޅުގަނޑުުމެން އެބަޖެހޭ ޕީޖީއަށް އިހުތިރާމް ކުރަން އެފަދަ ކަންތައްތަކަކީ އަޅުގަނޑުމެން މިހެން ތިއްބަވާ މިނިވަން މުއައްސަސާގެ ބޭބޭފުޅުން އެދިވަޑައިގަންނަވާ ގޮތަށް އެ ބޭފުޅުންނަށް ފުރިހަމައަށް އިހުތިރާމް ކޮށްގެން،" ނަސީމް ވިދާޅުވި އެވެ.
ކޮމިޓީގައި ތިއްބެވި މެންބަރުންގެ ވޯޓާ އެކު ނިންމެވީ ޕީޖީ ހާޒިރުކުރާ ކޮމިޓީ ސިއްރުކޮށްގެން ކުރިއަށް ގެންދިޔުމަށެވެ. ޝަމީމް ވަކިކުރަން ޖެހޭ އަށް ސަބަބެއް ބަަޔާންކޮށް، މަޖިލިހުގެ ރައީސް އަބްދުއްރަހީމް އަބްދުﷲ އަށް ފޮނުވި ސިޓީއެއް މީގެ ކުރިން ބޭއްވި ކޮމިޓީ ބައްދަލުވުމެއްގައި ޝާޑު ވަނީ އިއްވާފަ އެވެ. އެ ސިޓީގައި ފާހަގަކޮށްފައިވާ ކަންތައްތައް:
  • އަންހެން މުވައްޒަފުންތަކަކަށް ޖިންސީ ގޯނާ ކުރި ކަމުގެ ތުހުމަތުގައި ދައުވާ އުފުލި ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ ދައުވާނުކޮށް އަދި އެ މައްސަލަ ފައިލްކުރުން
  • ކޮރަޕްޝަނުގެ ތުހުމަތު ކުރެވޭ ކުރީގެ ޔޫތް މިނިސްޓަރު އަހުމަދު މަހުލޫފްގެ މައްސަލަ ފައިލްކުރުން
  • ސަފާރީގައި އަންހެނަކު ރޭޕްކުރި މައްސަލައިގެ ދަށު ކޯޓުގެ ނިންމުން އިސްތިއުނާފް ނުކުރުން
  • ރައްޔިތުންގެ މަޖިލިހުގެ މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ކްރިމިނަލް ކޯޓަށް ހުށަހެޅި މީހުން ޓްރެފިކް ކުރުމުގެ ދައުވާ އަނބުރާ ގެނައުން
  • ބަނގުރާ ބުއިމުގެ މައްސަލަތަކުގެ ދައުވާތައް އަނބުރާ ގެނައުން
  • ކޮވިޑުގެ ވެންޓިލޭޓަރުގެ މައްސަލާގައި ދައުވާނުކުރަން ނިންމުން
  • ޕީޖީގެ ޕަބްލިކް ޕްރޮސެކިއުޓާ އަހުމަދު ޝަފީއު އެއް ޖިންސުގެ ގުޅުން ހިންގި ކަމަށް ބުނާ މައްސަލަ ނުބެލުން
  • ޕީޖީ އޮފީހުގެ މުވައްޒަފުންނާ މެދު ތަފާތުކުރުންތައް ގެންގުޅޭ މައްސަލަ

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.