އިތުރަށް ދީފައިވާ 1،580 ސިޔާސީ މަގާމު މަދުނުކޮށް ޓެކްސްތައް ބޮޑު ކުރުމާ ދެކޮޅު: އަމީރު
ސިޔާސީ މަގާމުތަކުގެ ގޮތުގައި ސަރުކާރުން އިތުރަށް ދީފައިވާ 1،580 މަގާމު މަދުނުކޮށް ޓެކްސްތައް ބޮޑުކުރުމާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ދެކޮޅު ހަދައިފި އެވެ.
އިދިކޮޅު މައި ޕާޓީ، އެމްޑީޕީގެ އިކޮނޮމިކް ކޮމިޓީން ސިލްސިލާކޮށް ބާއްވަމުން އަންނަ ބައްދަލުވުންތަކުގެ ތެރެއިން މިއަދު އެ ޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވީ ޓެކްސްތައް ބޮޑުކުރަން ސަރުކާރުން ހުށަހަޅާފައި ވަނީ ފައިނޭންޝަލް ސްޓްރެޓެޖީ ފެއިލްވެގެން ކަމަށެވެ.
އިދިކޮޅުގައި ތިބިއިރު ހާލަތު އެނގޭ ކަމަށާއި ފައިސާ ހަމަޖެހިފައިވާ ކަމަށް ބުނި ނަމަވެސް މިހާތަނަށް އެކަން ކުރެވިފައި ނުވާ ކަމަށެވެ. މިދިޔަ އަހަރުގެ ސަޕްލިމެންޓްރީ ބަޖެޓު ހެދިއިރު، އިންތިގާލީ މަރުހަލާގައި މިހާރުގެ ފިނޭންސް މިނިސްޓަރު މޫސާ ޒަމީރު އިސްވެ ހުންނެވި ޓްރާންސިޝަން ކޮމިޓީ އާ މަޝްވަރާ ކުރެވުނު ކަމަށް އަމީރު ވިދާޅުވި އެވެ.
އެގޮތުން ސަޕްލިމެންޓްރީ ބަޖެޓަށް 200 މިލިއަން ޑޮލަރު އަދި މި އަހަރުގެ ބަޖެޓަށް 400 މިލިއަން ޑޮލަރު ހޯދާނެ ކަމަށް ބުނެފައިވާކަން އަމީރު ފާހަގަކުރެއްވި އެވެ. އެހީ ލިބޭނެ ކަމުގެ ފެހި ސިގްނަލްތައް ލިބިފައިވާތީ އައިއެމްއެފްގެ އެހީ ހޯދަން ނުޖެހޭނެ ކަމަށް ބުނި ކަމަށެވެ. އެހެންނަމަވެސް މުޅި ދުނިޔޭގައި ސިޓީ ހިފައިގެން ހިނގާ އެއްވެސް ގައުމަކުން ފައިނޭންސިން ހޯދިފައި ނުވާ ކަމަށެވެ. އިއުލާނުކޮށްގެން އެކި ޕްރައިވެޓް ފަރާތްތަކުން ވެސް އެހީ ނުލިބުނު ކަމަށެވެ. އެކަން އެހެން މެދުވެރިވީ އިތުބާރު ގެއްލިފައިވުމުން ކަމަށެވެ.
އެމްޑީޕީ ސަރުކާރުގެ ފިނޭންސް މިނިސްޓަރު ވިދާޅުވި ގޮތުގައި މި ސަރުކާރުން ޓެކްސް ބޮޑުކުރަން ނިންމީ އަންނަ އަހަރުގެ ބަޖެޓަށް ފައިނޭންސިން ކުރާނެ ގޮތެއް ހޯދޭގޮތް ނުވުމުން ކަމުގަ އެވެ. އެހެންނަމަވެސް ހަރަދު ކުޑަނުކޮށް ޓެކްސް ބޮޑުކުރުމާ އެމްޑީޕީން ދެކޮޅު ކަމުގައި އަމީރު ފާހަގަކުރެއްވި އެވެ.
"ހަރަދު ކުޑަނުކޮށް ޓެކްސް ބޮޑުކުރިޔަސް އޭގެން ލިބޭނެ ފައިދާއެއް އިގުތިސޯދަށް އަދި މާލީ ކަންކަން މެނޭޖް ކުރުމަށް ވެސް އޭގެން ލިބޭނެ އެއްވެސް ފައިދާއެއް ނެތް ކަމަށް އަޅުގަނޑުމެން ފާހަގަކުރަން،" އަމީރު ވިދާޅުވި އެވެ.
ހަރަދު ކުޑަކުރުމުގެ ގޮތުން އިތުރަށް ނަގާފައިވާ ހުރިހާ ސިޔާސީ މަގާމުތަކެއް މަދު ކުރަން ޖެހޭނެ ކަމުގަ އެވެ. ހުރިހާ ސިޔާސީ މަގާމުތަކެއް މަދުކޮށްފައި ނޫނީ ޓެކްސް ބޮޑު ކުރުމާ ދެކޮޅު ކަމަށާއި، ސަރުކާރުގެ ލިޔެކިޔުންތަކުން ދައްކާ ގޮތުން ސިޔާސީ ވަޒީފާތަކުގައި 2،280 މީހުން ތިބިއިރު، ސަރުކާރުން ހާމަކޮށްފައި ވަނީ އޭގެ ތެރެއިން 10 އިންސައްތަ މީހުން ވަކިކުރަން ކަމުގައި އަމީރު ވިދާޅުވި އެވެ.
"ވެރިކަމަށް އަންނަން ވެގެން މި ބޭފުޅުން ވާހަކަދެއްކިއިރު ފާހަގަކޮށްފައި ވަނީ ސިޔާސީ މަގާމުތައް 700 މީހުންނަށް ވުރެ އިތުރު ނުވާނެ ކަމަށް. މިހާރު ވެސް އިތުރަށް އެބަހުރި 1،580 މީހުން. އެ ސިޔާސީ މަގާމުތަކަށް ވާނީ ކިހިނެއްތޯ. އެ މަގާމުތައް މަދުކޮށްފައި ނޫނިއްޔާ ޓެކްސްތައް ބޮޑުކުރަން އަޅުގަނޑުމެން ދެކޮޅު،" އަމީރު ވިދާޅުވި އެވެ.
އޭނާ ވިދާޅުވީ 1،580 މީހުންގެ އިތުރުން ވަކިކުރަން ނިންމާފައިވާ 228 މީހުންނާ އެކު މަހަކު 40 މިލިއަން ރުފިޔާ މުސާރަ ދިނުމަށް ހޭދަކުރާ ކަމަށެވެ. އެއީ އަހަރަކަށް ބަލާ ނަމަ 480 މިލިއަން ރުފިޔާ ކަމަށެވެ. މީހުން މަގާމުތަކުން ވަކިކޮށްގެން ފަސް މިލިއަން ރުފިޔާ ސަލާމަތް ކުރެވޭނެ ކަމަށް ބުނާ ބުނުމަކީ ވެސް އޮޅުވާލުމެއް ކަމަށެވެ. ދައްކަން ޖެހޭނީ 1،580 މީހުންނަށް ކުރާ ހޭދައިގެ ވާހަކަ ކަމުގައި އަމީރު ފާހަގަކުރެއްވި އެވެ.
