ރައީސްގެ އެޑްވައިޒަރު ހަލީލް އިކޮނޮމިކް ކައުންސިލަށް
ރައީސް ޑރ. މުހައްމަދު މުއިއްޒުގެ ޓޫރިޒަމް އެޑްވައިޒަރު މުހައްމަދު ހަލީލް އިކޮނޮމިކް ކައުންސިލަށް އައްޔަން ކުރައްވައިފި އެވެ.
ހަލީލަކީ ފުޅާ ދާއިރާއެއްގައި ރިސޯޓުތައް ހިންގަމުން އަންނަ ޕަލްސް ހޮޓެލްސް އެންޑް ރިސޯޓްސްގެ މެނޭޖިން ޑިރެކްޓަރެވެ. އަދި ރިއޯލޯ ގްރޫޕުގެ އިތުރުން މަންތާ އެއާގެ ހިއްސާދާރެކެވެ.
ހަލީލު އިކޮނޮމިކް ކައުންސިލަށް އައްޔަންކުރައްވާފައި ވަނީ އިއްޔެ އެވެ. އޭނާ އެ ކައުންސިލަށް އައްޔަންކުރެއްވިއިރު، ރާއްޖޭގެ ބޭންކުތަކަށް ޑޮލަރު މާރުކުރަން މަޖުބޫރުކޮށް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލި ގަވާއިދަށް އަމަލު ކުރުމަށް ޕަލްސް ކުންފުނިން ވަނީ ދެކޮޅު ހަދާފަ އެވެ.
ޑޮލަރު މާރުކުރަން ބައެއް ރިސޯޓުތަކުގެ އޯނަރުން ދެކޮޅު ހަދައި އެކަން ސަރުކާރަށް އެންގި އެވެ. އަދި އެ ނިންމުން ބަދަލުކުރަން ރައީސް އޮފީހަށް ސިޓީ ވެސް ފޮނުވާފައިވެ އެވެ.
މައްސަލަ އާ ގުޅިގެން ރައީސް ވަނީ އެ ގަވާއިދު ބަދަލު ކުރުމުގެ ވިސްނުން ނުގެންގުޅުއްވާކަން ހާމަކުރައްވާފަ އެވެ. ވިދާޅުވެފައި ވަނީ ވިޔަފާރިވެރިން ވެސް ޖެހޭނީ ގާނޫނާއި ގަވާއިދުތަކަށް ތަބާވާން ކަމަށެވެ.
ގަވާއިދަށް ގެނެވުނު ބަދަލުގެ ސަބަބުން ވިޔަފާރިވެރިންނަށް ވެސް އެކަމުގެ ފައިދާތައް ކުރާނެ ކަމަށް ރައީސް ވިދާޅުވި އެވެ.
ވިދާޅުވީ ޓޫރިޒަމް އިންޑަސްޓްރީން ޖެނުއަރީން ފެށިގެން ޑޮލަރު މާރުކުރުމުގެ ކަންތައް ގަވާއިދާ އެއްގޮތަށް ކުރިއަށް ގެންދާ ނަމަ، 6 މަސް ދުވަހުގެ ތެރޭގައި މުދާ އިމްޕޯޓް ކުރުމުގައި ބޭންކުތަކުން ޓީޓީ ހެދުމަށް ވިޔަފާރިވެރިންނަށް ދޫކުރާ ޑޮލަރުގެ އަދަދު އިތުރުކޮށްދޭނެ ކަމަށެވެ.
އަދި ކްރެޑިޓް ކާޑުގެ ލިމިޓް ވެސް އިތުރުކުރާނެ ކަމަށް ސަރުކާރަށް އެއް އަހަރު ފުރުމާ ގުޅިގެން މިދިޔަ އާދިއްތަ ދުވަހުގެ ރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ފާހަގަކުރެއްވި އެވެ.
