އަޅުވެތިކަމާއި ދެކޮޅަށް މަސައްކަތް ކުރާ މީހުންނަށް ހައްދު ފަހަނައަޅާފައިވާ މީހުންގެ ލޭބަލް ޖެހުމަކީ ކަންބޮޑު ވާން ޖެހޭ ކަމެއް ނޫން:ނިޝާން

ޝައިޚް ނިޝާން މިހެން ވިދާޅުވެފައި ވަނީ "އިންޑިއާ އައުޓަކީ"ހަރުކަށި މީހުންގެ ހަރަކާތެއް ކަމުގައި ރައީސް ނަޝީދު ވިދާޅުވުމާއި ގުޅިގެން އެކަމާ ދެކޮޅަށް މީސް މީޑިއާގައި ވިދާޅުވި ބަސް ފުޅެއްގައެވެ.

ނިޝާން ވިދާޅުވީ ﷲ އާއި އެއިލާހުގެ ރަސޫލާ އެންގެވިގޮތް ފުރިހަމައަށް ތެދުކޮށް ޤަބޫލުކޮށް، އެގޮތަށް އުޅުމަށް މަސައްކަތްކުރާ ކޮންމެ މީހަކީ ލާދީނީ ފިކުރުގެ މީހުންގެ ކައިރީގައި ހައްދު ފަހަނައަޅާފައިވާ މީހެއް ކަމަށެވެ.

"ޕޯޗުގީޒުން ގެނެސް މިރާއްޖެ އަޅުވެތިކުރި ގޮތަށް މިތަން އަޅުވެތިކުރަން އުޅޭތަން ކަމަށާއި މިކަމާ ދެކޮޅަށް ތެދުވެ އަޑުއުފުލާ ކޮންމެ ބައެއްގެ ގައިގާ ހައްދު ފަހަނަ އަޅާފައިވާ ބައެއްގެ ލޭބަލް ޖެހުމަކީ ކަންބޮޑުވާން ޖެހޭކަމެއް ނޫނެވެ. ވެރިކަމުގެ ދަހިވެތިކަމުގައި މިއިސްލާމީ ދިވެހި ދީބު ކާފަރުންގެ އަޅުވެތިކަމަށް ދޫކޮށްލަން ބޭނުންވާ ފަރާތްތަކުން މިޙަޤީޤަތް ފޮރުވަނީއެވެ. ތާރީޚްގައިވެސް ކަން ހިނގާފައި އޮތީ މިހެންނެވެ." ނިޝާން ވިދާޅުވެފައިވެއެވެ.

ނިޝާން ވިދާޅުވީ އެފަދަ މީހުންނަށް ވެގެންވާނަމަ ދިވެހި ތާރީޚް އަލުން ލިޔެ އަލީ ރަސްގެފާނާއި ބޮޑުތަކުރުފާނާއި ދޮންބަންޑާރައިންނަކީ ހައްދު ފަހަނައަޅާފައިވާ ޓެރަރިސްޓުން ކަމަށް ސިފަކޮށް، ޕޯޗުގީޒުންނާއި މަލާބާރިން ނުވަތަ ހޮޅިންނަކީ މިނިވަންކަން ހޯދުމަށް މަސައްކަތްކުރި މީހުންގެގެ ގޮތުގައި ބަޔާން ކުރީސް ކަމަށެވެ.

ރައީސް ނަޝީދު އިއްޔެ ވަނީ ރާއްޖޭގެ ސިޔާސީ އިދިކޮޅު ފަރާތްތަކާއި ދީނީ ގިނަ އިލްމުވެރީންނަކީ އައިއެސްއަށް ތާއީދު ކުރާ ފަރާތްތަކެއް ކަމަށް ދޭހަވާ މޭރުމަކުން ވާހަކަފުޅު ދައްކަވާފައެވެ. އެގޮތުން އެމަނިކުފާނު ވިދާޅުވެފައި ވަނީ "އިންޑިއާ އައުޓް" އޭ ކިޔާ ގޮވަނީ ރާއްޖޭގައި ހަރަކާތްތެރިވާ އައިއެސްގެ ސެލްތަކުން ކަމަށެވެ. އަދި އެކަން މިހާރު ބައިނަލް އަގުވާމީ އިދާރާތަކަށް ސާފު ކަމަށާއި ޕީޕީއެމްއާއި ޕީއެންސީން އެ ޝިޢާރު ބޭނުން ކުރަން އެދެނީ ނަމަ އެ ބާރު ދެވެނީ އައިއެސްއިން މި ރާއްޖެ ހިފުމަށް ކަމަށް ވެސް ރައީސް ނަޝީދު ވިދާޅުވިއެވެ.

ރައީސް ނަޝީދު މިހެން ވިދާޅުވިއިރު ރާއްޖޭގައި އިންޑިއާގެ ސިފައިން ތިބުމާއި ދެކޮޅަށް އިދިކޮޅު ސިޔާސީ ފަރާތްތަކާއި ދީނީ ގިނަ ޢިލްމްވެރީންނާއި އާންމުންގެ ގިނަ ބަޔަކު ވެސް ދަނީ ޝުއޫރު ފާޅު ކުރަމުންނެވެ.