ފަލަސްޠީނުގެ ޙާލަތު އަދިވެސް އޮތީ ގޯސްކޮށް، ބައިނަލްއަޤްވާމީ މުޖުތަމަޢުން ޢަމަލީގޮތުން ތެދުވަންޖެހޭ: ރައީސް
ފަލަސްޠީނުގެ ޙާލަތު އަދިވެސް އޮތީ ގޯސްކޮށްކަމަށާއި ބައިންލައަޤްވާމީ މުޖުތަމަޢުން ޢަމަލީ ގޮތުން މަސައްކަތް ކުރަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދު ފާހަގަކުރާ ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހާ ގުޅިގެން އެމަނިކުފާނު އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، ހަމަލާތައް ހުއްޓާލުމުގެ އެއްބަސްވުމެއް އޮތް ނަމަވެސް ޔަހޫދީން މެދުކެނޑުމެއްނެތި ޣައްޒާއަށް ޙަމަލާތައް ދެމުން އަންނަ ކަމަށެވެ. އަދި ހުޅަނގު އައްސޭރީގެ އުތުރުން ބިންތައް ހިފައި ޔަހޫދީން އާބާދު ކުރުވަމުންދާ ކަމަށާއި ފަލަސްޠީނުގެ ރައްޔިތުން ދިރިއުޅުމަށާއި ހަމަޖެހުން ހޯދުމަށް އެކި ގޮތްގޮތުން ހުރަސްތައް ކުރިމަތިވަމުން އަންނަ ކަމަށް ރައީސް ވިދާޅުވިއެވެ.
މީގެއިތުރުން އެމަނިކުފާނު ވިދާޅުވީ، ފަލަސްޠީނުގެ ރައްޔިތުންގެ ޙައްޤުތައް ކަށަވަރުކޮށްދޭންޖެހޭ ކަމަށާއި އެ ރައްޔިތުންގެ އުންމީދުތައް ޙާޞިލްކޮށް ދިނުމަށް ބައިނަލްއަޤްވާމީ މުޖުތަމަޢުން ތެދުވަންޖެހޭ ކަމަށެވެ. އަދި ރައީސްގެ ޕޯސްޓް ނިންމަވާލެއްވީ ދިވެހިން ފަލަސްޠީނާއެކު ދެމި ތިބޭނެ ކަމުގެ ޔަޤީންކަން ދެއްވަމުންނެވެ. އަދި މިނިވަން މުސްތަޤިއްލު ދަޢުލަތެއްގެ ޤާއިމްކޮށް 1967ގެ ކުރީގެ ބޯޑަރުތަކަށް ރުޖޫޢަވެ، އިރުމަތީ ޤުދުސްއަކީ އެ ޤައުމުގެ ވެރި ރަށުގެ ގޮތުގައި ބަލައިގަންނަކަން ރައީސުލްޖުމްހޫރިއްޔާ ތަކުރާރު ކުރެއްވިއެވެ.
