ގާސިމްގެ މަރުގެ މައްސަލަ: އަދުހަމް މިހާރު ބުނަނީ ވަކީލަކު ބޭނުންނުވާ ކަމަށް!
ޓެކްސީ ޑްރައިވަރު ގާސިމް ހަސަނަށް ތޫނު އެއްޗަކުން ހަމަލާދީ މަރާލިކަމަށް ތުހުމަތު ކުރެވޭ މުޙައްމަދު އަދުހަމް މިމައްސަލަ ކުރިއަށް ގެންދަން ވަކީލަކު ބޭނުން ނުވާކަމަށް އޭނާ ބުނެފިއެވެ.
ގަސްދުގައި މީހަކު މެރި ކަމުގެ ދައުވާ އަދުހަމް އާއި ދެކޮޅަށް އުފުލާފައި ވާއިރު، އެ މައްސަލައިގެ ފުރަތަމަ އަޑުއެހުމުގައި އޭނާ ވަނީ ކުށަށް އިއުތިރާފު ވެފައެވެ. އަދި އެއިރު ދައުލަތުގެ ވަކީލަކު އިޚްތިޔާރު ކުރިއެވެ.
ނަމަވެސް އެހަފްތާގައި ބޭއްވި ދެވަނަ އަޑުއެހުމުގައި އަދުހަމް ވަނީ އެދައުވާއަށް އިންކާރުކޮށް، އަމިއްލަ ވަކީލަކު ހަމަޖެއްސުމުގެ ފުރުސަތަަކަށް އެދިފައެވެ.
މިމައްސަލައިގައި އަޑުއެހުމެއް ބޭއްވިތާ އަށް މަސް ފަހުން، މިއަދު ބޭއްވި އަޑުއެހުމުގައި އަދުހަމް ބުނެފައި ވަނީ ވަކީލަކު ހޯދަން ކަރެކްޝަނަލް ސާވިސްއިން އެއްބާރުލުން ނުލިބޭ ކަމަށެވެ.
"މިތަނުން ފޯނު ކޯލެއް ލިބޭނީ އެ އޮންނަ ޕްރޮސީޖާ ގެ ތެރެއިން. އެ ޕްރޮސީޖާގެ ތެރެއިން ދާން ހަދައިގެން ވަކީލަކު ހަމަ ޖެއްސުމަށް އަދި ފޯނު ކޯލެއް ލިބިފައެއް ނުވޭ،" އޮންލައިންކޮށް ބޭއްވި އަޑުއެހުމުގައި އަދުހަމް ބުންޏެވެ.
އަދުހަމް ބުނީ ވަކީލަކު ނެތް ނަމަވެސް ހުރިހާ ލިޔެކިޔުމެއް އަތަށް ލިބުމުން އެމައްސަލަ ކުރިއަށް ގެންދަން ތައްޔާރަށް ހުރި ކަމަށާއި ދިވެހި ރާއްޖޭގެ ޤާނޫނު އަސާސީ އެނގޭ މިންވަރަކުން ކުރިއަށް ދެވިދާނެ ކަމަށެވެ.
އޭނާއަށް ކޮށްފައިވާ ތުހުމަތުގެ މިމައްސަލަ ވަރަށް ރަނގަޅަށް ދިރާސާ ކޮށްފައިވާ ކަމަށާއި ވަކީލަކު ހަމަޖެހުނު ނަމަވެސް އަމިއްލައަށް އެކަހެރިކޮށް ބައްދަލު ނުކުރެވޭނަމަ ވަކީލަކު ހުރުމުގެ ބޭނުމެއް ނެތް ކަމަށް ވެސް އަދުމަހް ބުނެފައިވެއެވެ.
ދައުލަތުގެ ފަރާތުން ހަމަޖައްސައިދިން ދިފާއީ ވަކީލު އަތުގައި މައްސަލައިގެ ލިޔެކިޔުންތައް ހުރުމުން، އެތަކެތި މިއަދު ކަރެކްޝަންސާއި ހަވާލު ކުރާނެ ކަމަށް ވަކީލު ވިދާޅުވިއެވެ.
މިދިޔަ އަހަރު ހިނގި މިހާދިސާގައި، ގާސިމް މަރާލުމަށްފަހު ފިލައިގެން އުޅެނިކޮށް ފުލުހުން އަދުހަމް ހައްޔަރު ކޮށްފައިވަނީ މިދިޔަ އަހަރުގެ ޑިސެމްބަރު މަހުގެ 20 ވަނަ ދުވަހުގައެވެ.
އަދުމަހް އަކީ ވައްކަމާއި ފޭރުމުގެ ކުށުގެ ރެކޯޑު އޮންނަ މީހެކެވެ.
Ads by STO
