ފުލުހުންގެ ބިލުގައި އޮތީ ބަދަލު ހިފުން: ސައީދު
ރޭގައި މަޖިލިހުން ފާސްކޮށްފައިވާ ފުލުހުންގެ ބިލަކީ، ބަދަލު ހިފުމުގެ ރޫހުގައި އޮތް މުޅި ރާއްޖޭގެ މަސްލަހަތު ގެއްލިގެންދާނެ ބިލެއް ކަމަށް މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ.
"ސީދާ އެމްޑީޕީގެ ވިސްނުމާ އެއްގޮތަށް" ފާސްކުރި އެބިލަކީ ބަދަލު ހިފުމުގެ ރޫހުގައި މުޅި ރާއްޖޭގެ މަސްލަޙަތު ގެއްލިގެންދާނެ ބިލެއް ކަމަށް ސައީދު ވިދާޅުވެފައި ވަނީ ފުލުހުންގެ ބިލް ރޭ ފާސްކުރުމުގެ އިރުކޮޅެއް ކުރިން ބިލާ ގުޅޭ ގޮތުން ވާހަކަފުޅު ދައްކަވަމުންނެވެ.
އިދިކޮޅު މެންބަރުން ފަހުން ވަނީ ރޭގެ ޖަލްސާ ބޯއިކޮޓްކޮށް ޖަލްސާ ކުރާ މާލަމުން ވެސް ނިކުމެވަޑައިގެންފައެވެ. ނަމަވެސް ފުލުހުން އަމަލު ކުރަން ޖެހޭނެ އާޤާނޫނު ރޭ މަޖިލީހުން ވަނީ ފާސްކޮށްފައެވެ. އެޤާނޫނަށް އަމަލު ކުރަން ފަށާނީ ރައީސުލްޖުމްހޫރިއްޔާ ޤާނޫނު ތަސްދީގު ކުރެއްވުމުންނެވެ.
މާވަށު ދާއިރާގެ މެންބަރު އަދި ކުރީގެ އިކޮނޮމިކް މިނިސްޓަރ ސައީދު ވިދާޅުވީ އެ ބިލަކީ ފުލުހުންގެ މުއައްސަސާގެ ޕްރޮފެޝަނަލިޒަމް ކަނޑުވައިލާނެ ބިލެއް ކަމަށެވެ.
"މިއަދު ކުރުކޮށް ވެސް، ދިގުކޮށް ވެސް އަޅުގަނޑު ދަންނަވާލަން އޮތީ، މިއީ ބަދަލުހިފުމުގެ ބިލެއް. މި ބިލުގެ ސަބަބުން ހަމައެކަނި ކުރައްވަން އުޅުއްވާ ކަމަކީ ބަޣާވާތުގެ ކަންތަކޭ ވިދާޅުވެ، އޭގެ ހަސަދަ ފިލުވައިލުމުގެ މަސައްކަތް. އަޅުގަނޑަށް މަނިކުފާނު ވެސް އަދި ދިވެހިރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވެސް މިއަދު ހަމަ ފުލުހުންގެ ޔުނިފޯމްގައި އިންނަ ތަން ފެންނަނީ. އެމްޑީޕީގެ ޖަގަހައަކަށް ތަން ބަދަލުވެގެންދާ ތަން އަޅުގަނޑުމެންނަށް ފެންނަނީ. އިއްޒަތްތެރި ރައީސްގެ ބަދަލުހިފުމަކުން ލިބޭނެ ފޮނި ނަތީޖާއެއް ނޯންނާނެ." މަޖިލިސް ޖަލްސާގައި ސައީދު ވިދާޅުވެފައިވެއެވެ.
