ގުޅިފަޅާއި ތިޅަފުށި ފަޅުގައި ހުއްދަ ނުހޯދައި އަޅައިފައިވާ އުޅަނދުތައް ނަގަން އަންގައިފި
ހައުސިން ޑިވެލޮޕްމަންޓް ކޯޕަރޭޝަން(އެޗްޑީސީ)ގެ ހުއްދަ ނުހޯދައި ކ. ގުޅިފަޅާއި ކ. ތިލަފުށީ ފަޅުގައި އަޅާފައި ހުރި އުޅަނދުތައް ނުނަގައިފި ނަމަ އެ ކޯޕަރޭޝަނުން އުޅަނދުތައް އެތަނުން ނަގާނެ ކަމަށް ހައުސިން އަންގައިފިއެވެ.
އެޗްޑީސީން ރޭ ކުރި އިއުލާނެއްގައި ބުނެފައި ވަނީ ގުޅިފަޅާއި ތިލަފުށީ ފަޅުގައި ހުއްދަ ނުނަގައި އަޅާފައި ހުރި އޮޑިދޯނިފަހަރު ނެގުމަށް ކިތަންމެ ފަހަރަކު މީގެ ކުރިން އަންގާފައިވާނެ ކަމަށާއި، އެފަދަ އުޅަނދުތައް އެ ކޯޕަރޭޝަނުން ނެގުމަށް މިހާރު އުސޫލެއް އެކުލަވާލާފައިވާ ކަމަށެވެ.
އަދި ދެން އެފަދަ އުޅަނދުތަކާމެދު ފިޔަވަޅު އަޅަމުންދާނެ ކަމަށް ވެސް އެޗްޑީސީން ބުނެއެވެ.
އެޗްޑީސީން ބުނީ އުޅަނދުތައް އެ ސަރަހައްދުގައި ހުރުމުން އެ ކޯޕަރޭޝަން އަދި ސަރުކާރުން އެ ސަރަހައްދުގައި ހިންގަން ރާވާފައިވާ އެތައް ޕްރޮޖެކްޓަކަށް ހުރަސް އެޅި އެ ސަރަހައްދު ބޭނުން ކުރާ ފަރާތްތަކަށް ދަތިވެ، އެ ސަރަހައްދުގެ ތިމާވެއްޓަށް ވެސް ދަނީ ވަރަށް ބޮޑަށް ގެއްލުންވަމުން، ކަމަށެވެ.
އެޗްޑީސީން ބުނީ ގުޅިފަޅާއި ތިލަފުށީ ފަޅުގައި އެއްވެސް އުޅަނދެއް ނުވަތަ މުދަލެއް ބަހައްޓާފައިވާ ފަރާތެއްވާ ނަމަ 1516 އަށް ގުޅައިގެން އެ ތަކެތި ނެގުމަށް އިލްތިމާސް ކުރާ ކަމަށެވެ.
