އިމާރާތަކުން ވެއްޓި ނިޔާވީ، މުދައްރިސުން ނުހަނު ލޯބިވާ ދަރިވަރެއް: ޑރ.ޝަހީމް
ރޭ ދަންވަރު 12ގެ ފަހުން، ބެލްކަނިން ވެއްޓި ނިޔާވެފައިވަނީ "ކޮއްކޮމެން ޕްރީ ސްކޫލް"ގައި ކިޔަވަމުން ދިޔަ ދަރިވަރެއް ކަމަށާއި، އެއީ މުދައްރިސުން ނުހަނު ލޯބިވާ ކުއްޖެއް ކަމަށް ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޑރ.ޝަހީމް ކުރެއްވި ޓްވީޓެއްގައި ވިދާޅުވި، ނިޔާވެފައިވާ އުމުރުން ހަތަރު އަހަރުގެ ނުޢުމާނު ބިން މުޙައްމަދު ރަޝީދަކީ ކޮއްކޮމެން ޕްރީސްކޫލްގެ ޖޭކޭޖީގެ ދަރިވަރެއް ކަމަށާއި، އެ ކުއްޖާ ނިޔާވި ޚަބަރު އެއްސެވީ ފުން ހިތާމައާ އެކުގައި ކަމަށެވެ. ނުޢުމާންގެ ޢާއިލާއަށް ޝަހީމް ތަޢުޒިޔާ ވެސް ދެންނެވިއެވެ.
ހެންވޭރު ގެއެއްގެ ފަސް ވަނަ ބުރިން ހަތަރު އަހަރުގެ ފިރިހެން ކުއްޖާ ވެއްޓުނީ ރޭ ދަންވަރު 12:00 ޖަހައި ބޮޑުވި ފަހުންނެވެ. އަދި ކުއްޖާ ނިޔާވީ އޭޑީކޭގައި ފަރުވާ ދެމުން ދަނިކޮށެވެ.
ފުލުހުން ވިދާޅުވީ، އެ ހާދިސާގެ މައުލޫމާތު ލިބުމާ ގުޅިގެން އެކަން އިތުރަށް ބަލަމުން އަންނަ ކަމަށެވެ. އަދި ކުއްޖާ ވެއްޓުނީ ކިހިނެއް ކަމެއް ސާފެއް ނުވެއެވެ.
