އިންޑިއާ މީހަކު ރާއްޖެއަށް ވަގަށް ރަން އެތެރެ ކުރަން މަސައްކަތް ކޮށްފި
ވަގަށް ރާއްޖެއަށް ރަން އެތެރެކުރަން އުޅުނު އިންޑިއާ މީހަކު ޖޫރިމަނާކުރަން ކްރިމިނަލް ކޯޓުން ޙުކުމް ކުރައްވައިފިއެވެ.
އެ މީހާ ރާއްޖެއަށް ވަގަށް ރަން އެތެރެ ކުރަން އުޅުނީ، ފައިގެ ކަށިމަތީގައި ތަތްކޮށްގެންނެވެ.
ކްރިމިނަލް ކޯޓުން މިދިޔަ މަހުގެ 29 ވަނަ ދުވަހު ކުރެއްވި ޙުކުމުގައި ވަނީ ޖޫން 2022 ގައި އިންޑިއާގެ ރައްޔިތެއް ކަމަށްވާ ހާރިފް މެލަޑެތް އަބޫބަކުރުގެ ހަށިގަނޑު ބަލައި ފާސްކުރިއިރު އޭނާގެ ދެފައިގެ ކަށިމަތީގައި މާސްކިންގ ޓޭޕްއަޅައި ތަތްކޮށްފައިވާ ރަންކުލައިގެ ޕޭސްޓް ހިމެނޭ ދެ ޕެކެޓް ފެނިފައިވާ ކަމަށެވެ.
މި މައްސަލައިގައި ހާރިފްގެ މައްޗަށް އުފުލި ”ދިވެހިރާއްޖެއަށް ސިއްރުން މުދާ އެތެރެކުރުމުގެ ދައުވާ” ސާބިތުވާތީ ޝަރީއަތުން ނިންމެވީ 120,000 ރުފިޔާއިން ހާރިފް ޖޫރިމަނާކުރުމަށެވެ.
އަދި އެ ފައިސާ ރަސްމީ ހަތަރު ދުވަހުގެ ތެރޭގައި މީރާއަށް ދައްކަން ވަނީ އަންގަވައިފައެވެ.
މީގެއިތުރުން އޭނާގެ އަތުން ފެނުނު ރަން ކަސްޓަމްސްއަށް ނެގުމަށް ވެސް ޝަރީއަތުން ވަނީ އަންގަވައިފައެވެ.
