ރާއްޖެއިން ނައްތައިލެވުނު ހިމަބިހި އަނެއްކާވެސް ފެނިއްޖެ
ރާއްޖެއިން އަނެއްކާވެސް "މީސްލްސް" ނުވަތަ ހިމަބިހި ފެނިއްޖެއެވެ.
ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ވިދާޅުވީ، ބަލި ފެނުނީ އައްޑޫ ސިޓީން ކަމަށާއި، އިތުރު ކުއްޖަކަށް ބަލި ޖެހުނު ކަމަށް ބެލެވޭތީ، ސާމްޕަލް ނަގައިގެން، ޓެސްޓު ކުރުމުގެ މަސައްކަތް ކުރަމުން އަންނަ ކަމަށެވެ.
އެޗްޕީއޭއިން ވިދާޅުވީ، އައްޑޫ ސިޓީގައި ބަލި ޖެހުނު ދެ ކުދިންގެ ފަރާތުން، ބަލި ފެތުރޭނެ މުއްދަތު ފަހަނަ އަޅައި ގޮސްފައިވާތީ، އެ ކުދިންގެ ފަރާތުން ބަލި ފެތުރުމުގެ ފުރުސަތެއް ނެތް ކަމަށެވެ.
ނަމަވެސް، ބަލި ފެނުނު ސަބަބު ދެނެގަތުމަށާއި، ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް ދަނީ އަޅަމުންނެވެ.
ހިމަބިއްސަކީ ރާއްޖެއިން ނައްތާލެވިފައިވާ ބައްޔެއް ނަމަވެސް، 2020 ވަނަ އަހަރުގެ ތެރޭގައި މި ބަލި ވަނީ ރާއްޖެއިން ފެނިފައެވެ. އެ އައުޓްބްރޭކާއެކު، އަލުން ވެކްސިން ކެމްޕެއިން ފެށި ނަމަވެސް، މެދުކަނޑައިލަން ޖެހުނީ، ކޮވިޑް-19ގެ އައުޓްބްރޭކަށް ފަހުގައެވެ.
