ސްކޫޓަރެއް ވަގަށް ނެގި މީހަކު ހޯދަން، އާއްމުންގެ އެހީއަށް އެދިއްޖެ
ކުޑަކުދިންގެ ސްކޫޓަރެއް ވަގަށް ނެގި ކަމުގެ ތުހުމަތުގައި މީހަކު ހޯދަން ފަށައިފިއެވެ.
ވައްކަން ކޮށްގެން ދާ މަންޒަރު ފެންނަ ވީޑިއޯއެއް ފުލުހުން މިއަދު ވަނީ އާއްމު ކުރައްވައިފައެވެ.
ފުލުހުން މިއަދު ވިދާޅުވީ، އެ ވީޑިއޯއިން ފެންނަ މީހާއަކީ ވައްކަމުގެ މައްސަލައަކާ ގުޅިގެން ގަލޮޅު ޕޮލިސް ސްޓޭޝަނުން ކުރަމުންދާ ތަހުގީގަށް ހޯދަން ބޭނުންވެ، ފުލުހުން މިހައިތަނަށް ކުރި މަސައްކަތުން ކާކުކަން ދެނެގަނެވިފައި ނުވާތީ، ހޯދިފައިނުވާ މީހެއް ކަމަށެވެ.
އަދި ވީޑިއޯއިން ފެންނަ މީހާއާ ބެހޭ އެއްވެސް މަޢުލޫމާތެއް ލިބިފައިވާނަމަ ގަލޮޅު ޕޮލިސް ސްޓޭޝަންގެ ނަންބަރު 9631696 އަށް ގުޅުމަށް ފުލުހުން އެދިވަޑައިގެންފައިވެއެވެ.
ފުލުހުން އާންމުކުރި މި ވީޑިއޯއިން ފެންނަ މީހާގެ އަތުގައި އޮތީ ކުޑަކުދިން ގެންގުޅޭ ސްކޫޓަރެކެވެ.
މިފަދަ ވައްކަމުގެ މައްސަލަތަކާ ގުޅިގެން، ފުލުހުން މީގެ ކުރިންވެސް އާއްމުންގެ އެހީތެރިކަމަށް އެދިފައިވެއެވެ.
