ޖަލުގައި ޙުކުމް ތަންފީޒު ކުރަމުން ދިޔަ މީހަކު މަރުވެއްޖެ
މާފުށީ ޖަލުގައި ޙުކުމް ތަންފީޛްކުރަމުންދިޔަ ބިދޭސީއަކު މަރުވެއްޖެއެވެ.
މަރުވެފައިވަނީ ބަންގްލަދޭޝްގެ ރައްޔިތެއް ކަމުގައިވާ އަމީނުލް އިސްލާމް ،29،އެވެ.
މިކަމާ ގުޅޭގޮތުން ކަރެކްޝަންސް އިން ވިދާޅުވީ، ހެނދުނުގެ ސައިވަގުތު ނުހޭލާ އޮތުމާ ގުޅިގެން ގޮވަން އުޅުމުން އެއްވެސް ހަރަކާތެއް ނުކުރާތީ، އޭނާ އެމަޖެންސީގައި މާފުށީ ހެލްތް ސެންޓަރަށް ގެންދިޔަ ކަމަށާއި އަމީނުލް ނިޔާވިކަމަށް ޑޮކްޓަރު ކަނޑައަޅާފައިވަނީ މިއަދު 2:10 ގައި ކަމަށެވެ.
އޭނާ މަރުވެފައިވަނީ ހިތް ހުއްޓިގެން ކަމަށް ހެލްތް ސެންޓަރާއި ހަވާލާދީ ކަރެކްޝަންސް އިން މަޢުލޫމާތުދެއްވައެވެ.
އަމީނުލް އިސްލާމްއަކީ ބަދްއަޙްލާޤީ އަމަލު ހިންގުމާ ގުޅިގެން ހަތް އަހަރު ދުވަހުގެ ޙުކުމެއް ތަންފީޛްކުރަމުން ދިޔަ މީހެކެވެ.
އޭނާ އަކީ އެއްވެސް ބައްޔަކަށް ފަރުވާ ހޯދަމުން އަންނަ މީހެއް ނޫން ކަމަށް ކަރެކްޝަންސް އިން ވިދާޅުވެއެވެ.
އޭޏާ މަރުވުމުން އެ ހާދިސާގެ މައުލޫމާތު ވަގުތުން ކަމާ ގުޅުން ހުރި ހުރިހާ އިދާރާއަކަށް އަންގާފައިވާނެ ކަމަށް ކަރެކްޝަންސް އިން ހާމަކުރެ އެވެ.
