އިގްތިސާދީ ގޮތުން ޗައިނާއަށް ބަރޯސާވާ މިންވަރު ކުޑަކުރުމުގެ ޕްލޭނަށް އީޔޫގެ ވަޒީރުން ތާއީދުކުރައްވައިފި
ޔޫރަޕިއަން ޔޫނިއަން (އީޔޫ)ގެ ވަޒީރުން ހުކުރު ދުވަހު ޗައިނާއަށް އިގްތިސާދީ ގޮތުން ބަރޯސާވާ މިންވަރު ކުޑަކުރުމަށް ތާއީދު ކުރެއްވި ކަމަށާއި ނަމަވެސް އެކަން ހަގީގަތަކަށް ހަދާނެ ގޮތެއް މިހާރު ދެނެގަންނަން ޖެހޭނެ ކަމަށް ޔޫރަޕިއަން ޔޫނިއަންގެ ޚާރިޖީ ސިޔާސަތުގެ ވެރިޔާ ޖޯސެފް ބޮރެލް ވިދާޅުވި އެވެ.
ބޮރެލް ވިދާޅުވީ، ސިޔާސީ ވާދަވެރިއެއްގެ ހައިސިއްޔަތުން ޗައިނާގެ ދައުރަށް ބޮޑު އަހަންމިއްޔަތުކަމެއް ދިނުމަށް ޓަކައި ޗައިނާއާ މެދު ސިޔާސަތު ތައް ހަމަޖެއްސުމުގެ ޕްލޭނަށް ޚާރިޖީ ވަޒީރުން ވަރަށް ބޮޑަށް ތާއީދު ކުރައްވާ ކަމަށާއި، ބެއިޖިންއަކީ ބައިނަލްއަގުވާމީ ކަންކަމުގައި ބައިވެރިއެއްގެ ގޮތުގައި އަދި އިގްތިސާދީ ވާދަވެރި ގައުމެއްގެ ގޮތުގައި ދެކެވަޑައިގަންނަވާ ކަމަށެވެ.
"އަޅުގަނޑުމެން ހުށަހެޅި ކަރުދާހަށް އެކުވެރިން މަރުހަބާ ކިޔަނީ. ޗައިނާއާ ބެހޭ ގޮތުން އަޅުގަނޑުމެންގެ ސްޓްރެޓެޖީގެ މި ރީ-ކެލިބްރޭޝަންގެ އަސާސީ ލައިންތަކަށް އެ ބޭފުޅުން އެއްބަސްވޭ،" ސްޓޮކްހޯމްގައި ބޭއްވި ބައްދަލުވުމަށް ފަހު ނޫސްވެރިންނާ ވާހަކަ ދައްކަވަމުން ބޮރެލް ވިދާޅުވި އެވެ.
"ޑިޕެންޑެންސީ މާ ބޮޑުވެއްޖެ ނަމަ އެއީ ރިސްކެއް،" އޭނާ އިއުލާނު ކުރި އެވެ.
ބޮރެލް ވިދާޅުވީ ޔޫކްރެއިންގައި މޮސްކޯއިން ކުރި ހަނގުރާމައިގެ ކުރީ އަހަރުތަކުގައި ރަޝިއާގެ ގޭހަށް މާ ބޮޑަށް ބަރޯސާވެފައިވާތީ އީޔޫއިން ހެދި "ސްޓްރެޓެޖިކް މިސްޓޭކް" އިން ފިލާވަޅު ނަގަން ޖެހިފައިވާ ކަމަށެވެ.
އޭނާ ވިދާޅުވި ގޮތުގައި އީޔޫ އަކީ ރަޝިއާގެ ހަކަތައަށް ވުރެ ބޮޑަށް ސޯލާ ޕެނަލް ފަދަ މުހިންމު ޓެކްނޮލޮޖީތަކަށާއި ކްރިޓިކަލް މެޓީރިއަލްތަކަށް ޗައިނާއަށް ބަރޯސާވެފައިވާ ގައުމެކެވެ.
