ރިފްޢަތު މަޖިލީހުގެ އިމްތިޔާޒަށް އަރައިގަތް ކަމަށް ބުނެ، މައްސަލަ ހުށަހަޅައިފި
ބަންޑާރަ ނާއިބު އިބްރާހިމް ރިފްޢަތުގެ މައްޗަށް ރައްޔިތުންގެ މަޖިލީހަށް ހުށަހަޅައިގެން ކުރިއަށްގެންދާ އިތުބާރުނެތްކަމުގެ މައްސަލައަށް ޖަވާބު ދެއްވުމުގައި މަޖިލީހުގެ އިމްތިޔާޒަށް އަރައިގަނެފައިވާކަމަށް ބުނެ، ކުއްލި މައްސަލައެއް ހުށަހަޅުއްވައިފިއެވެ.
މަޖިލީހުގެ މިއަދުގެ ޖަލްސާއަށް މި ކުއްލި މައްސަލަ ހުށަހެޅުއްވީ ފަރެސް މާތޮޑާ ދާއިރާގެ މަޖިލިސް މެންބަރު ޙުސެއިން މުޙައްމަދު ލަތީފު(ސެމްބެ)އެވެ.
ސެމްބެ ހުށަހެޅުއްވި މައްސަލަގައި ވަނީ، ބަންޑާރަ ނައިބުގެ އިތުބާރު ނެތްކަމުގެ މައްސަލައަށް، އޭނާ ލިޔުމުން ދެއްވި ޖަވާބުގައި، މަޖިލީހުގެ ޤާނޫނާ ޤަވާއިދުތަކަށް ގޮންޖައްސަވައިފައިވާ ކަމަށާއި، އެކަން ކުށްވެރި ކުރައްވާ ކަމަށެވެ.
ތިން ބާރު ވަކިވެފައިވާ ނިޒާމެއްގެ ރައްޔިތުންގެ މަޖިލީހަކީ އެއް ބާރަށް ވާއިރު، ދަޢުލަތުގެ ވަޒީރުން، އަދި ބަންޑާރަ ނައިބަކީވެސް ރައީސުސުލްޖުމްހޫރިއްޔާއަށާއި، މަޖިލީހަށް ޖަވާބުދާރީ ވާން ޖެހޭނެ ފަރާތެއް ކަމަށް ޤާނޫނު އަސާސީގެ 134 ވަނަ މާއްދާގެ(ހ)ގައި ބަޔާންކޮށްފައިވާކަން މައްސަލައިގައި ވަނީ ފާހަގަކުރައްވައިފައެވެ.
"އެހެންކަމުން، ބަންޑާރަ ނައިބު، އަދި ވަޒީރުންގެ އިޙްތިޞާސްގެ ތެރެއިން، ކުރެވިގެންދާ ކޮންމެ ކަމެއްގައި، އެ ފަރާތްތަކާ ސުވާލުކޮށް ޖަވާބު ހޯދުމަކީ ރައްޔިތުންގެ މަޖިލީހުގެ ޤާނޫނުން ލާޒިމުކޮށް، އަދި އެ ބާރު ކަށަވަރު ކޮށްދީފައިވެއެވެ. އަދި އެއީ، އެ ފަރާތްތައް ޒިންމާދާރު ކުރުމަށް ކޮންމެހެންވެސް ކުރަންޖެހޭ ކަމެއް ކަމުގައިވެސް ފާހަގަހަގަކުރަމެވެ."
މައްސަލައިގައި ބުނީ، މަޖިލީހުން ޖަވާބު ބޭނުންވާ ކޮންމެ ކަމެއްގައި، ތެދު ބަހުން ޖަވާބު ނުދެއްވައި، ޖަދަލު ކުރުމަކީ ކުރެއްވޭނެ ކަމެއް ނޫން ކަމަށެވެ.
ސެމްބެ މި މައްސަލަ ހުށަޅުއްވަމުން ގެންދެވިއިރު، ސަރުކާރަށް ތާއީދު ކުރައްވާ މެމްބަރުން އަޑު ގަދަ ކުރައްވައި، ހުރަސް އަޅުއްވަން މަސައްކަތް ކުރެއްވިއެވެ.
އަދި މައްސަލަ ހުށަހެޅުއްވުމުން ސަރުކާރު ހިންގާ މައި ޕާޓީ، އެމްޑީޕީގެ މެޖޯރިޓީ އޮންނަ މަޖިލީހުން ވަނީ، މައްސަލަ ބޭރުކޮށްލައިފައެވެ.
އޭޖީގެ އިތުބާރު ނެތްކަމުގެ މައްސަލަ ހުށަހެޅީ، ރާއްޖޭގެ ކަނޑުގެ ސަރަހައްދުގެ ބައެއް ދޫކޮށްލި ކަމަށް ކުރާ ތުހުމަތުގައެވެ. އެ މައްސަލައިގައި އިއްޔެ މަޖިލީހަށް ހާޒިރުވެވަޑައިގެން، ރިފްޢަތު ވަނީ ޖަވާބުދާރީވެވަޑައިގެންފައެވެ. މި މައްސަލައިގެ ވޯޓަށް އިއްޔެ ވެސް އަހައިފައެއް ނުވެއެވެ.
