މިއަދުވެސް މަޖިލިސް މެދުކަނޑައިލަން ޖެހިއްޖެ
ރައްޔިތުންގެ މަޖިލީހުގެ މިއަދުގެ ޖަލްސާ ވެސް، ކުރިއަށް ނުގެންދެވި، މެދުކަނޑައިލަން ޖެހިއްޖެއެވެ.
މަޖިލީހުގެ ރިޔާސަތުގައި އިންނެވި ވިލުފުށި ދާއިރާގެ މެންބަރު ހަސަން އަފީފް ވިދާޅުވީ ނިޒާމީ މައްސަލަތަކުގައި މެންބަރުން ފާހަގަކުރައްވާ މައްސަލަތަކާ ގުޅިގެން އޭނާ ސާފުކުރަންޖެހޭ ކަންތައްތަކެއް އެބަހުރި ކަމަށާއި، މަޖިލިސް ފަށާނީ، އެކަންކަން ސާފު ކުރުމަށް ފަހުގައި ކަމަށެވެ.
"އެހެންވީމާ އެކަން ސާފުކުރުމަށް ދެން މަޖިލިސް ފަށާނީ. މިވަގުތު އަޅުގަނޑު މަޖިލިސް ހުއްޓާލަން،" އަފީފް ވިދާޅުވިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ހޫނުވީ އެމްޑީޕީގެ މަރަދޫ ދާއިރާގެ މެންބަރު އިބްރާހީމް ޝަރީފް، ރައީސް މުޙައްމަދު ނަޝީދުގެ އިމްތިޔާޒު މައްސަލަ ހުށަހަޅުއްވަމުން އެ މައްސަލަ ނިމެންދެން މަޖިލީހުގެ މިދައުރުގެ ޖަލްސާތައް ދަންމާލަން ހުށަހެޅުއްވުމާ ގުޅިގެންނެވެ.
ޝަރީފް ހުށަހެޅުއްވި މައްސަލައިގައި ބުނެފައިވަނީ ރައްޔިތުންގެ މަޖިލީހުގެ ނައިބް ރައީސް އީވާގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހަޅައިފައިވާ ކަމަށާއި ނަމަވެސް އެ ޖަލްސާގެ ރިޔާސަތު ބެލެހެއްޓުމަށް މަޖިލީހުގެ ރައީސް އިންކާރުކުރައްވާ ކަމަށެވެ. އަދި އެއީ މުޅި މަޖިލީހުގެ އިމްތިޔާޒަށް އަރައިގަތުމުގެ ޢަމަލެއް ކަމަށެވެ.
"މިއަދާ ހަމައަށްވެސް ރައްޔިތުންގެ މަޖިލީހުގެ ރައީސް އެ ޖަލްސާގެ ރިޔާސަތު ބަލަހައްޓަން އިންކާރުކުރައްވާ ރައްޔިތުންގެ މަޖިލީހުގެ އިމްތިޔާޒަށް ވަނީ އަރާވަޑައިގެން މަޖިލީހުގެ ޤަވައިދާއި ޤާނޫނު އަސާސީއާ ޚިލާފަށް ޢަމަލުކުރައްވާފައިކަން އަޅުގަނޑު ފާހަގަކުރަން،" ޝަރީފް ހުށަހެޅުއްވި މައްސަލައިގައިވެއެވެ.
Ads by STO
