ރޭޕްގެ ޝިކާރައަކަށްވި ފަތުރުވެރިޔާ އިންސާފު ހޯދަން އެދި، ދެ ރައީސުންނަށް ސިޓީއެއް
ދިވެހިރާއްޖެއަށް އައިސް އުޅެނިކޮށް، ރޭޕްގެ ޝިކާރަކަށްވި ފަތުރުވެރިޔާ އިންސާފު ހޯދަން އެދި، ރައީސް އިބްރާހީމް މުޙައްމަދު ޞާލިޙަށާއި، ރައްޔިތުންގެ މަޖިލީހުގެ ރައީީސް މުޙައްމަދު ނަޝީދަށް ސިޓީ ފޮނުވިފިއެވެ.
ރޭޕްގެ ޝިކާރައަކަށް ވެފައިވަނީ، ދަ ރިޓްޒް ކާޓަން މޯލްޑިވްސް ފަރި އައިލެންޑުގައި ޗުއްޓީ ހޭދަކުރަމުން ދިޔަ ޗައިނާގެ ފަތުރުވެރިއެކެވެ.
ދެ ރައީސުންނަށް ފޮނުވި ސިޓީ އާންމުކޮށްފައި ވަނީ ފަތުރުވެރިޔާ ކުރި ޓްވީޓެއްގައެވެ.
އެގޮތުން ޒޫ ޔި ޓޮންގް ވަނީ ރިޓްޒް ކާޓަން މޯލްޑިވްސް ފަރި އައިލެންޑްގައި ހިނގާދިޔަ ރޭޕް ކޭހުގައި އޭނާއަށް އިންސާފު ހޯދައި ދިނުމަށް އެދި ދެ ރައީސުންގެ އަރިހުން އެދިފައެވެ.
އަދި އެ މައްސަލަ ދިވެހި ފުލުހުންގެ ޚިދުމަތަށް ރިޕޯޓުކޮށް އެ މައްސަލައިގައި ކުރިއެރުމެއް ލިބިފައި ނުވާކަން ސިޓީގައި ވަނީ ފާހަގަކޮށްފައެވެ.
އޭނާ ވަނީ ރޭޕްގެ މައްސަލަ ފައިލް ކޮށްފައިވާ ކޭސް ނަންބަރު ހިމަނައި، އިންސާފު ހޯދައިދިނުމަށް ދެ ރައީސުން މަސައްކަތް ކުރައްވާނެ ކަމަށް ޤަބޫލުކުރާ ކަމަށް ބުނެފައެވެ.
ރޭޕްގެ ޝިކާރައަކަށްވި ފަތުރުވެރިޔާ އޭނާއަށް ދިމާވި ކަންކަން، ވަރަށް ތަފްސީލުކޮށް، ޓްވިޓަރގައި ކިޔާދިނެވެ. މި މަހުގެ 6 ވަނަ ދުވަހު ރާއްޖެ އައި އެ ފަތުރުވެރިޔާ ރޭޕް ކުރީ، އޭނާ ހުރި ރިސޯޓުގައި މަސައްކަތް ކުރާ ބަޓްލަރެއް ކަމަށް އޭނާ ތުހުމަތު ކުރެއެވެ.
Ads by STO
