ޖާބިރު އަލުން އެމްޑީޕީއާ ގުޅުމަކީ ކުރިއެރުމެއް، އިންތިޚާބަށް ލިބުނު އެހީއެއް: ރައީސް
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު، ޖާބިރު އެމްޑީޕީއާ ގުޅިވަޑައިގަތުމަކީ، އެމްޑީޕީ އަށާއި، އެމަނިކފާނަށް ވެސް ލިބިވަޑައިގެންނެވި ވަރަށް ބޮޑު ކުރިއެރުމެއް ކަމަށާއި، މިއީ ރިޔާސީ އިންތިޚާބަށް ލިބުނު ބޮޑު "އެހީތެރިކަމެއް ކަމަށް" ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޑީއާރްޕީގެ ކުރީގެ ލީޑަރު، ޖާބިރު އެމްޑީޕީއާ ގުޅިވަޑައިގަތުމާ ގުޅޭގޮތުން މިއަދު ނޫސްވެރިންނާ ވާހަކަފުޅު ދައްކަވަމުންނެވެ. ރައީސް ސިފަ ކުރެއްވި ގޮތުގައި، ޖާބިރު ތިން ވަނަ ފަހަރަށް އެމްޑީޕީއާ ގުޅިވަޑައިގަތުމަކީ އެ ޕާޓީއަށާއި، އެމަނިކުފާނަށް ވެސް ލިބުނު އެހީތެރިކަމެކެވެ.
"ކުރިއަށް މިއޮތް ރިޔާސީ އިންތިޚާބު ކާމިޔާބު ކުރުމުގައި ޖާބިރުގެ ދައުރު، ހިއްސާ ކުރިއަށް އޮތްތަނުގައި ލިބިގެންދާނެ ކަމާމެދު، ދޭތެރެއަކު އަޅުގަނޑު ޝައްކެއް ނުކުރަން، އަދި އެއީ އިންތިޚާބު ކާމިޔާބު ކުރުމަށް ލިބޭ ވަރަށް ބޮޑު އެހީތެރިކަމަކަށް ވެގެންދާނެ."
ރައީސް ޞާލިޙު އިތުރަށް ވިދާޅުވީ، 2018 ވަނަ އަހަރު އެމްޑީޕީން ވެރިކަން ހޯދިއިރު ވެސް، ޖާބިރު ހުރިހައި ގޮތަކުންވެސް އެހީތެރިވެވަޑައިގެންނެވި ކަމަށެވެ. ރައްޔިތުންގެ މަޖިލީހުގައި ވެސް، ޖާބިރާއެކުގައި ގިނަ މަސައްކަތްތަކެއް ކުރެވުނުކަން ފާހަގަކުރައްވައި، ރައީީސް ވިދާޅުވީ، އެ ތަޖުރިބާއަށް ބަލާއިރު، ޖާބިރާއެކު ކާމިޔާބު މަސައްކަތްތަކެއް ކުރެވޭނެ ކަމަށް ޔަޤީން ކުރައްވާ ކަމުގައެވެ.
