ގޯތީގެ ގޮތުގައި ލިބުނު ބިމުގައި ވިޔަފާރިވެސް ކުރެވޭނެ: އަސްލަމް
މާލެ ސަރަހައްދުން ގޯތި ލިބުނު މީހުންގެ ލިސްޓު އާންމުކޮށްފައި ވާއިރު، އެތަނުގައިި ގެސްޓްހައުސް އެޅުން މަނާ ނުކުރާ ކަމަށް ޕްލޭނިން މިނިސްޓަރު މުޙައްމަދު އަސްލަމް ވިދާޅުވެއްޖެއެވެ.
އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަސްލަމް ވިދާޅުވީ ބިން ދޫކުރަނީ ދިރިއުޅެން ކަމަށާއި، ނަމަވެސް ރާއްޖޭގެ އެއްވެސް ތަނެއްގައި އެގޮތަށް ދޫކުރާ ބިމެއްގައި ވިޔަފާރި ކުރުން މަނާ ނޫން ކަމަށެވެ.
"ބަންޑާރަ ބިން ދެނީ އަބަދުވެސް ދިރިއުޅެން. އެހެންނަމަވެސް ރާއްޖޭގެ އެއްވެސް ތަނެއްގަ އަދި މަނަލެއް ނުއެއް ކުރޭ ބަންޑާރައިން ދީފަ އޮތް ބިމެއްގަ ވިޔަފާރިއެއް ކުރާކަށެއް." އަސްލަމް ވިދާޅުވިއެވެ.
އިއްޔެ އާންމު ކުރި ވަގުތީ ލިސްޓާއި ގުޅިގެން ޝަކުވާ ހުށަހެޅުމަށް ބޭނުންވާ ފަރާތްތަކުން "ގެދޮރުވެރިން ޕޯޓަލް" މެދުވެރިކޮށް ޝަކުވާ ހުށަހެޅުމުގެ ފުރުސަތު އަންނަ މަހުގެ 15 ގެ ނިޔަލަށް އޮންނާނެއެވެ.
ޕްލޭނިން މިނިސްޓަރު އަސްލަމް ވިދާޅުވީ މި ޕްރޮގްރާމަށް 15،164 ފޯމް ހުށަހެޅި ކަމަށެވެ.
އޭގެތެރޭގައި ޖޮއިންޓް އެޕްލިކޭޝަންތަކާއިއެކު 23،088 މީހަކު ފޯމު ހުށަހެޅި ކަމަށް އަސްލަމް ވިދާޅުވިއެވެ. އޭގެ ތެރެއިން ޝަރުތު ހަމަވީ 12،794 ފޯމް ކަމަށާއި އޭގެ ތެރޭގައި ހިމެނެނީ 19،857 މީހުން ކަމަށް އަސްލަމް ވިދާޅުވިއެވެ.
އިއްޔެ ގެޒެޓްކޮށްފައިވަނީ އޭގެ ތެރެއިން 10،314 މީހަކަށް ލިބޭ ގޯއްޗެވެ.
