މަސްތުގެ ވަބާގައި ޖެހި ދުނިޔެ ދޫކުރި ޒުވާނެއްގެ މަންމަ އާއި ބައްދަލުކުރައްވައި، އުމަރު ދެއްވީ މިފަދަ މައްސަލަތައް ޙައްލު ކުރައްވާނެ ކަމުގެ ޔަޤީންކަން
މަސްތުވާތަކެތި ބޭނުންކުރަމުން ގޮސް، އޯވަރޑޯޒް ވެގެން މަރުވި ޒުވާނެއްގެ މަންމަ އާއި ބައްދަލުކުރައްވައި، ރިޔާސީ އިންތިޚާބުގައި ވާދަ ކުރައްވާ ޢުމަރު ނަސީރު ހިތްވަރު ދެއްވައިފިއެވެ.
ރިޔާސީ ކެމްޕެއިނުގައި އުމަރު ދެއްވާ ޔަޤީންކަމަކީ އޭނާގެ ވެރިކަމެއްގައި މަސްތުވާތަކެތީގެ މައްސަލަ ޙައްލު ކުރައްވައި، މަސްތުވާތަކެތި އެތެރެ ކުރާ ބޯޓުތައް ކަނޑު ފައްތާނެކަމުގެ ޔަޤީން ކަމެވެ.
އުމަރުގެ ފޭސްބުކްގައި ހިއްސާ ކުރެއްވި ވީޑިއޯއަކުން ފެންނަ ގޮތުގައި، އުމަރު ވަނީ މަސްތުގެ ވަބާގައި ޖެހި، މީގެ 10 ވަރަކަށް އަހަރު ކުރިން މަރުވި، އުމުރުން 27 އަހަރުގެ ޒުވާނެއްގެ މަންމަ އާއި ބައްދަލު ކުރައްވައެވެ. އަދި އެ ޒުވާނާ އެ ޙާލަތަށް ދިޔަ ގޮތް އުމަރު އޮޅުންފިލުއްވައެވެ.
އެ މަންމަގެ ލޮލުން ކަރުނަ އޮހޮރޭ ޙާލުގައި ކިޔައިދިނީ، ދަރިފުޅު ގްރޭޑް 9އިން ފެށިގެން، މަސްތުގެ ވަބާގައި ޖެހުނު ކަމެވެ. އަދި މިކަން މަންމަގެ ސަމާލުކަމަށް އައުމުން، ދަރިފުޅު ރަނގަޅު ކުރަން ރީހެބަށް ފޮނުވަން ތިން އަހަރު މަސައްކަތް ކުރަން ޖެހުނު ވާހަކަ ވެސް ބުންޏެވެ.
އުމަރު ވިދާޅުވީ، މިފަދަ ކަންކަމުގައި ކަމާބެހޭ ފަރާތްތަކުން އަވަސް އެހީތެރިކަން ފޯރުކޮށްދޭން ޖެހޭ ކަމަށެވެ. އޭނާގެ ވެރިކަމެއްގައި މި މައްސަލަ ޙައްލު ކުރެއްވުމަށް، ކުރެވެން ހުރި ހުރިހައި ކަމެއް ކުރައްވާނެ ކަމަށް ވެސް ވިދާޅުވިއެވެ.
"ދައްތަމެންގެ ތި ރުއިމާއި ހިތާމައިގެ ތެރެއިން، އަޅުގަނޑުމެންނަށް އިތުރު ހިތްވަރު ވެސް ލިބޭ މަސައްކަތް ކުރިއަށް ގެންދަން."އުމަރު ވިދާޅުވިއެވެ.
މަރުވި އެ ޒުވާނާ އަކީ މައެއްގެ ހުރި ހަމައެކަނި ފިރިހެން ދަރިއެވެ. އޭނާ މަރުވީއިރު، އަންބަކާއި ދަރިއަކު ވެސް ހުއްޓެވެ.
