ޕީޕީއެމް-ޕީއެންސީއާއި ގުޅުނީ ޤައުމީ ކަމެއްގެ ގޮތުގައި ދެކިގެން: ނާޒިމް
އިދިކޮޅު ޕީޕީއެމް-ޕީއެންސީ އާއި ގުޅިވަޑައިގަތުމަށް ނިންމެވީ ވަރަށް މުހިންމު ޤައުމީ ކަމެއްގެ ގޮތުގައި ދެކިވަޑައިގެން ކަމަށް އެމްއެންޕީގެ ރައީީސް މުޙައްމަދު ނާޒިމް ވިދާޅުވެއްޖެއެވެ.
ޕީޕީއެމް-ޕީއެންސީ އާއި އެމްއެންޕީގެ ކޯލިޝަން އެއްބަސްވުމުގައި ސޮއިކުރެއްވުމާއި ގުޅޭގޮތުން، މިއަދު ބޭއްވި ނޫސްވެރިންގެ ބައްދަލުވުމުގައި ރިޔާސީ އިންތިޚާބުގައި އެމްއެންޕީން ގޮތުން ވާދަކުރެއްވި ނާޒިމް ވިދާޅުވީ، ހޮނިހިރު ދުވަހު ބޭއްވި ރިޔާސީ އިންތިޚާބުގައި ރައްޔިތުން ދެ ކެންޑިޑޭޓަކަށް "ޝޯޓްލިސްޓް" ކުރިއިރު، އެމްއެންޕީން ޤަބޫލު ކުރާ އުސޫލުތަކާއި އެއްގޮތް ބަޔަކަށް ފެނުނީ ޕީޕީއެމް-ޕީއެންސީ ކަމަށެވެ.
ސިޔާސީ މަސައްކަތް ފެއްޓެވީ، ޕީޕީއެމްގައި ހުންނަވައިގެންކަން ފާހަގަކުރައްވައި، އެއީ ގާާތް ޕާޓީއެއް ކަމަށް ވެސް ނާޒިމް ވިދާޅުވިއެވެ.
"ވަރަށް އިޙްތިރާާމް ކުރާ، ވަރަށް ލޯބިވާ ޕާޓީއެއް އެއީ، މިވަގުތު ދުރުގައި ހުރި ކަމުގައި ވިޔަސް، ހިތް އަބަދުވެސް، އެ ޕާޓީއާއިއެކުގައި އޮތް." އޭނާ ވިދާޅުވިއެވެ.
މަޖިލީހުގެ ދަނގެތީ ދާއިރާގެ މެމްބަރުކަންވެސް ކުރައްވާ ނާޒިމް ވިދާޅުވީ، އެމްއެންޕީ އާއިއެކުގައި ތިބި ގިނަ މީހުންނަކީ ވެސް، ޕީޕީއެމްގެ ފިކުރުގެ މީހުން ކަމަށާއި، އެހެންކަމުން އެ ޕާޓީއާއިއެކުގައި މަސައްކަތް ކުރަން ފަސޭހަ ވާނެ ކަމަށެވެ.
ނާޒިމް އިތުރަށް ވިދާޅުވީ އޭނާ ރިޔާސީ ކެމްޕެއިނުގައި، 150 ރަށަށް ދަތުރު ކުރެއްވި ކަމަށާއި، އެ ދަތުރުތަކުން އެނގުނީ ރައްޔިތުން މި ވެރިކަން ބަދަލުކުރަން ބޭނުންވާ މިންވަރު ކަމަށެވެ.
"އަދި، މި ދިވެހި ގައުމު ދަންނާނެ، އަޅުގަނޑުމެންނަކީ ގައުމީ، އަދި ވަތަނީ ބައެއްކަން."
ޕީޕީއެމް-ޕީއެންސީ އާއި އެމްއެންޕީގެ މެނިފެސްޓޯ ވަރަށް ބޮޑަށް ގުޅޭކަން ފާހަގަކުރައްވައި، އެ ދެ ޕާޓީގެ "ދިވެހީންގެ ރާއްޖެ" ޝިޢާރާއި އެއްގޮތަށް އެމްއެންޕީއަށް މަސައްކަތް ކުރެވޭނެ ކަމަށް ވެސް ނާޒިމް ވިދާޅުވިއެވެ.
