އައު ސަރުކާރުގެ ކެބިނެޓަށް ތަޢުލީމީ، ޤާބިލު ބޭފުޅުންތަކެއް!
އިންތިޚާބީ ރައީސް ޑރ.މުޙައްމަދު މުޢިއްޒު މަޤާމުގެ ހުވާ ކުރައްވަން ހަފްތާއަކަށް ވަނީ ވެފައެވެ.
ޑރ.މުޙައްމަދު މުޢިއްޒު ރިޔާސީ ކެމްޕެއިން ތެރޭގައި ވިދާޅުވަމުން ގެންދެވި އެއް ވާހަކަފުޅަކީ އެމަނިކުފާނުގެ ސަރުކާރުގެ ކެބިނެޓަކީ ވަރަށް ތަޢުލީމީ، އަދި ޤާބިލު ކެބިނެޓަކަށް ވާނެ ވާހަކައެވެ. އެގޮތުން ކެބިނެޓުން ޖާގަ ލިބިވަޑައިގަންނަވާނީ ވަރަށް ހީވާގި ބޭފުޅުންނަށް ކަމަށް އެމަނިކުފާނު ކުރިން ވިދާޅުވިއެވެ.
މިގޮތުން މިހައިތަނަށް މީޑިއާތަކަށް ހާމަވެފައިވާ މަަޤާމުތަކަށް ބަލާއިރު އެމަނިކުފާނުގެ ކެބިނެޓުގައި ޕީއެޗްޑީ ޙާސިލުކުރައްވައިފާ 10 މިނިސްޓަރުން ތިއްބަވާނެއެވެ.
ހޯމް މިނިސްޓަރަކަށް އައްޔަނު ކުރައްވަނީ، ސިފައިންގެ ކެޕްޓަންކަމުން ރިޓަޔާކުރައްވައިފައިވާ ކެޕްޓަން އަލީ އިހުސާނެވެ. ދިފާޢީ ވަޒީރަކަށް ޕީޕީއެމްގެ ނައިބުރައީސް ގުރައިދޫ ދާއިރާގެ މަޖިލިސް މެންބަރު ޣައްސާން މައުމޫނު ވަޑައިގަންނަވާއިރު، ޖެންޑަރ މިނިސްޓަރަކަށް ކުރީގެ އެޑިއުކޭޝަން މިނިސްޓަރު ޑރ.އައިޝަތު އަލީ އައްޔަނު ކުރެއްވުމަށް ވަނިީ ހަމަޖެހިފައެވެ. ޕީޕީއެމްގެ ނައިބު ރައީސް، އަދި ނައިފަރު ދާއިރާގެ މަޖިލިސް މެންބަރު އަޙްމަދު ޝިޔާމު ފިޝަރީޒް މިނިސްޓަރުކަމަށް ވަޑައިގަންނަވާއިރު، ޕްލޭނިން މިނިސްޓްރީއާއި އެންވަޔަރަމަންޓު މިނިސްޓްރީ އެއްކޮށްލާފައި އުފައްދާ މިނިސްޓްރީ ޙަވާލު ކުރައްވާނީ ކުރީގެ އެންވަޔަރަމެންޓު މިނިސްޓަރު ޠާރިޤު އިބްރާހީމާއެވެ.
ޓްރާންސްޕޯޓުގެ ދާއިރާ ހަވާލުކުރައްވަނީ މޯލްޑިވިއަންގެ ޑައިރެކްޓާ އޮފް އޮޕަރޭޝަންސްގެ މަޤާމު ކުރިން އަދާކުރެއްވި ކެޕްޓަން މުޙައްމަދު އަމީނާއެވެ. އެއީ ޑރ.މުޢިއްޒުގެ ކެމްޕެއިން މެނޭޖަރެވެ.
ހެލްތު މިނިސްޓަރުކަމަށް ނިލަންދޫ ދާއިރާގެ ކުރީގެ މަޖިލިސް މެންބަރު ޑރ.ޢަބްދުﷲ ޚަލީލު ވަޑައިގަންނަވާއިރު، ފިނޭންސް މިނިސްޓަރުކަމަށް ވަޑައިގަންނަވަނީ މިހާރު ހައުސިން ޑިވެލޮޕްމެންޓު ފައިންނޭންސް ކޯޕަރޭޝަން (އެޗްޑީއެފްސީ)ގެ ސީއެފްއޯގެ މަޤާމުގައި ހުންނެވި ޑރ.މުޙައްމަދު ޝަފީޤެވެ. އަދި ސްޕޯޓްސް މިނިސްޓަރުކަމަށް ވަޑައިގަންނަވަނީ ސްޕޯޓްސް ފިޒިޝަން، ރާފިޢުއެވެ.
ޓޫރިޒަމް މިނިސްޓަރުކަމަށް ވަޑައިގަންނަވަނީ ޕީއެންސީގެ ޗެއާޕާސަން ޢަބްދުއްރަހީމްގެ ދަރިކަލުން އިބްރާހީމް ފައިސަލެވެ.
ޕީއެންސީގެ ނައިބު ރައީސް މުޙައްމަދު ސައީދު އިކޮނޮމިކް މިނިސްޓަރަކަށް އައްޔަނު ކުރައްވާއިރު، ހަމަ އެ ޕާޓީގެ ނައިބު ރައީީސް އާދަމް ޝަރީފު ހަވާލުވެވަޑައިގަންނަވަނީ މުޅިން އަލަށް އުފައްދާ ކައުންސިލުތަކުގެ މިނިސްޓްރީއާއެވެ. އަދި ފޮރިން މިނިސްޓަރަކަށް ހަމަޖައްސަވަނީ މޫސާ ޒަމީރެވެ.
އެޑިއުކޭޝަން މިނިސްޓަރު ޑރ.ޢާއިޝަތު ޝިހާމު ޖެންޑާ މިނިސްޓަރުކަމަށް ވަޑައިގަންނަވާއިރު، އިސްލާމިކް މިނިސްޓަރުކަމަށް ވަޑައިގަންނަވާނީ ރައީސް ޔާމީން ޢަބްދުލްޤައްޔޫމްގެ ވެރިކަމުގައިވެސް އެ މަޤާމު ފުރުއްވި ޑރ.މުޙައްމަދު ޝަހީމު އަލީ ސަޢީދެވެ.
އެޑިއުކޭޝަން މިނިސްޓްރީ ހަވާލުކުރައްވަނީ ކުރިން އެ ވުޒާރާގެ ސްޓޭޓު މިނިސްޓަރުކަން ކުރެއްވި ޑރ.އިސްމާއީލް ޝަފީއުއާއެވެ.
އިންފްރަސްޓްރަކްޗާ އެންޑް ކޮންސްޓްރަކްޝަނާއި ގުޅޭ މިނިސްޓްރީއާއި ޙަވާލުވެ ވަޑައިގަންނަވަނީ ޑރ.މުޢިއްޒުގެ އަރިހުގައި ހައުސިން މިނިސްޓްރީގައި މަސައްކަތް ކުރެއްވި ޑރ.ޢަބްދުﷲ މުއްޠަލިބެވެ.
އަދި ހައުސިން މިނިސްޓަރުކަމަށް ޑރ.އަލީ ހައިދަރު ވަޑައިގަންނަވާއިރު، ހަޔާ އެޑިއުކޭޝަން މިނިސްޓަރުކަމަށް ވަޑައިގަންނަވަނީ ޑރ.މަރިޔަމް މާރިޔާއެވެ. އެގްރިކަލްޗާ މިނިސްޓަރުގެ މަޤާމަށް ވަޑައިގަންނަވަނީ ޑރ.ޢާއިޝަތު ރަމީލާއެވެ.
ބަންޑާރަނައިބުގެ މަޤާމަށް ވިލިމާލެ ދާއިރާގެ މެންބަރު އަޙްމަދު އުޝާމު ވަޑައިގަންނަވާއިރު، ޔޫތު މިނިސްޓަރުކަމަށް އައްޔަންކުރައްވަނީ ނޫސްވެރިޔާ އިބްރާހީމް ވަޙީދު (އަސްވާޑު)އެވެ.
