ސިޔާސީ ވަޒީފާގެ އަދަދު ނުބުނެވިގެން އުޅެނީ ތަހުލީލެއް ކުރާ ވަރަށް ގިނަކޮށްލީމަ: ފިއްޓެ
ރައީސް ޑރ. މުހައްމަދު މުއިއްޒުގެ ސަރުކާރުގައި އައްޔަންކުރި ސިޔާސީ މުވައްޒަފުންގެ އަދަދު ހާމަނުކުރެވި ލަސްވަމުން ދަނީ "ތަހުލީލެއް ކުރަން ޖެހޭ ވަރަށް" މުވައްޒަފުން ގިނަކޮށްފައި ވާތީ ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓެ) މިރޭ ވިދާޅުވެއްޖެ އެވެ.
އިދިކޮޅު އެމްޑީޕީގެ ހަރުގޭގައި "ކުރީ ސަރުކާރު" ނަމުގައި ބޭއްވި ޖަލްސާގައި ވާހަކަ ދައްކަވަމުން ފިއްޓެ ވިދާޅުވީ ސިޔާސީ ވަޒީފާތަކުގެ އަދަދު އިންތިހާއަށް އިތުރުކޮށްފައިވާ ކަމަށެވެ. ދައުލަތް ހިންގުމުގައި ތާށިވެގެން އުޅޭ ކަމަކީ ވެސް ރައްޔިތުންގެ މަޖިލީހުގެ އިންތިހާބާ ދިމާކޮށް އިތުރު ކުރި ވަޒީފާތަކުގެ ސަބަބުން ކަމަށް ވިދާޅުވެ ސަރުކާރަށް ގިނަ ތުހުމަތުތަކެއް ވެސް އޭނާ ކުރެއްވި އެވެ.
"ކޮންމެ ވަޒީރެއް ފަހަތުގައި އެއް ޓަނު ސްޓޭޓް މިނިސްޓަރުން، އެއް ޓަނު ޑެޕިއުޓީ މިނިސްޓަރުން އެބަ ތިބޭ، އެ އެންމެނަށް ފާރަވެރިވާން އަޅުގަނޑުމެން އެމްޑީޕީގެ މި ތިބީ 12 މެންބަރުން، އަޅުގަނޑުމެން ޓަނެއް ވެސް ހަމައެއް ނުވޭ، އެކަމަކު ފާރަވެރިވުމުގައި އެންމެ އިންޗިއެއް ވެސް ފަހަތަކަށް ނުޖެހޭ،" ފިއްޓެ ވިދާޅުވި އެވެ.
ކެމްޕެއިނުގައި ކަން ހިނގައިދިޔަ ގޮތް ކަމަށް ތުހުމަތު ކުރައްވަމުން ފިއްޓެ ވިދާޅުވީ ރަށްރަށުގެ ކޮންމެ ގޭބިސީއަކުން މީހަކަށްވާ ވަރަށް ވެސް ވަޒީފާ ދީފައި އެބަ ހުރި ކަމަށެވެ. އެއީ އަދި ސަރުކާރު ކުންފުނިތަކުން ދީފައިވާ ވަޒީފާ އެކަނި ކަމަށް އޭނާ ތުހުމަތު ކުރެއްވި އެވެ.
"ވަޒީފާ ޗިޓު ބެހީ، އަޅުގަނޑުމެން ގެއަށް ވެސް އައި ޗިޓެއް، އެ ގެއިންނޯ ޗިޓުކޮޅުގައި ލިޔަންވީ އެ ގެއިން ވަޒީފާއަށް ނުކުންނަންވީ ކުއްޖެއް ވެސް،" ފިއްޓެ ވިދާޅުވި އެވެ.
އަދަދު ދިރާސާކޮށްފައި ނޫނީ ނޭނގޭ ވަރަށް ސިޔާސީ ވަޒީފާތައް ކަނޑައެޅުމުން އެ އަދަދު ހާމަކުރުމުގައި ދަތި ކަމެއް ހުންނާނެ ކަމަށް، މަޖާޒީ ރާގެއްގައި އޭނާ ވިދާޅުވި އެވެ.
"ކުރިން އާރުޓީއައި އެކްޓިވިސްޓަކަށް އުޅުނު، މިހާރު މަޖިލީހުގެ މެންބަރެއް (ހިތަދޫ މެދު ދާއިރާގެ މެންބަރު އަހުމަދު އަޒާން) ވެސް ވިދާޅުވަނީ ސަރުކާރުން އެބަ މަސައްކަތް ކުރަމޯ، އެ އަދަދެއް އެނގޭ ވަރު ކުރަން ފިނޭންސް މިނިސްޓަރު ވެސް މަޖިލީހުގެ ކޮމިޓީގައި ވިދާޅުވީ ރައީސް އޮފީހުން އެ އަދަދު ހޯދަން ތަހުލީލެއް ކުރަމުން އެބަ ގެންދެޔޯ،" ފިއްޓެ ވިދާޅުވި އެވެ.
ސަރުކާރުން އަދި ސިޔާސީ މަގާމުތަކުގެ ޖުމުލަ އަދަދު ރަސްމީކޮށް ހާމައެއް ނުކުރެ އެވެ. ސިޔާސީ މުވައްޒަފުންގެ އަދަދު 700 އަށް ވުރެ އިތުރު ނުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
