ކައުންސިލްތައް އޮޑިޓް ކުރުން އިތުރުކޮށް ހަރުދަނާ ކުރާނަން: މިނިސްޓަރު
ލޯކަލް ކައުންސިލްތައް އޮޑިޓް ކުރުން އިތުރުކޮށް ނިޒާމު ހަރުދަނާ ކުރުމަށް މަސައްކަތް ކުރާނެ ކަމަށް ލޯކަލް ގަވަނަންސް މިނިސްޓަރު އާދަމް ޝަރީފް ވިދާޅުވެއްޖެ އެވެ.
ތ. ދިޔަމިގިލީ ކައުންސިލްގެ ތިޖޫރީގައި ހުރި ފައިސާތަކެއް މަދުވެގެން މިހާރު ހުރީ ކައުންސިލުން ވެސް އެދިގެން ކުރި އޮޑިޓުން އެނގުނު ގޮތުގައި އެ ކައުންސިލްގެ ތިޖޫރީން ހަ ލައްކައަށް ވުރެ ގިނަ ރުފިޔާ ވަނީ ގެއްލިފަ އެވެ.
މިއީ އެ ކައުންސިލްގެ ފުރަތަމަ އޮޑިޓް ރިޕޯޓެވެ. ލާމަރުކަޒީ ނިޒާމް ތައާރަފުވެ ރަށްރަށުގައި ކައުންސިލްތައް އެކުލަވާލިތާ 13 އަހަރުވީ އެވެ. ރަށު ކައުންސިލުން ބުނަނީ ރަށް ހިންގާ އިދާރާއެއް މިދިޔަ 25 އަހަރު އޮޑިޓް ކޮށްފައެއް ނުވެ އެވެ.
އާދަމް ޝަރީފްގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައި އެ ހަބަރު ހިއްސާ ކުރައްވައި ވިދާޅުވީ ކައުންސިލްތައް އޮޑިޓްކުރެވޭ ވަރު ރަނގަޅު ކުރަން އޮޑިޓް އޮފީހާއި ލޯކަލް ގަވަރުމަންޓް އޮތޯރިޓީއާ މަޝްވަރާ ކުރައްވާނެ ކަމަށެވެ.
"މިފަދަ ކަންކަން ތަކުރާރު ނުވާނެ ގޮތަކަށް ކައުންސިލްތަކުގެ ހިންގުން ހަރުދަނާ ކުރާނަން," އާދަމް ޝަރީފް ލިޔުއްވާފައިވެ އެވެ.
Ads by STO
