މަންމައަށް ވަޅިން ހަމަލާދީ ފޯނު ފޭރުނު މީހަކު ހައްޔަރުކޮށްފި
މަންމައަށް ވަޅިން ހަމަލާދީ ފޯނު ފޭރުނު މީހަކު ހައްޔަރުކޮށްފި އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ ހުޅުމާލޭ ހިޔާ ފްލެޓު އެޗް13ގެ އެޕާޓްމެންޓަކުން އަންހެނަކު ރޯ އަޑުއިވިގެން އިއްޔެ ރޭ 6:30 ހާއިރު ފުލުހުންނަށް ރިޕޯޓެއް ލިބިގެން ސީން އަށް ދިޔަ ކަމަށެވެ.
އަދި އެތަނަށް ދިއުމުން އަންހެނަކު ދޮރުހުޅުވި ކަމަށާއި އަދި އެ އަންހެން މީހާއަށް އޭނާގެ ފިރިހެން ދަރިފުޅު އަނިޔާކޮށް ވަޅިން ހަމަލާދީ މަރާލާނެ ކަމަށް ބުނެ ފޯނު ފޭރިގެން ގެއިން ނިކުމެގެން ގޮސްފައިވާ ކަމަށް ބުނި ކަމަށެވެ.
ފުލުހުން ބުނީ އެ މައްސަލައިގައި އެ އަންހެން މީހާގެ ދަރިފުޅު، ހ. އެހަޑަ، މުހައްމަދު އިސްމާއިލް، 28 މިއަދު ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ.
ފުލުހުން ބުނީ އެ ހާދިސާއާ ގުޅިގެން އަނިޔާ ލިބުނު 57 އަހަރުގެ އަންހެން މީހާ ހޮސްޕިޓަލަށް ގެންގޮސް ފަރުވާ ދިނުމަށް ފަހު ދޫކޮށްލައިފައިވާ ކަމަށެވެ.
އެ މައްސަލަ އިތުރަށް ތަހުގީގުކުރަމުންދާ ކަމަށް ވެސް ފުލުހުން ބުންޏެވެ.
