ކައުންސިލުން ކުރި ހަރަދު އަނބުރާ ލިބޭގޮތަށް ބުޅާ ފެސިލިޓީ މިނިސްޓްރީއާ ހަވާލުކުރަނީ
މާލެ ސިޓީ ކައުންސިލުން އިސްނަގައިގެން އެގްރިކަލްޗާ އެންޑް އެނިމަލް ވެލްފެއާ މިނިސްޓްރީއާ ގުޅިގެން ގާއިމްކުރި "އޮޅު ހިޔާ"، ބުޅާ ފެސިލިޓީ އަށް ކައުންސިލުން ހޭދަކުރި ފައިސާ އަނބުރާ ކައުންސިލަށް ލިބޭގޮތަށް، ފެސިލިޓީ މިނިސްޓްރީއާ ހަވާލުރަން ނިންމައިފި އެވެ.
ސިޓީ ކައުންސިލުން ޕްލޭންކޮށްފައި އޮތީ މާލޭ ސަރަހައްދުގައި އުޅޭ ބުޅާތައް އެ ބުޅާ ފެސިލިޓީއަށް އިއްޔެ ގެންދަން ފެށުމަށެވެ.
ނަަމަވެސް އަމަލުކުރާނެ އެސްއޯޕީތަކަށް ރިއާޔަތްނުކޮށް އެ ފެސިލިޓީއަށް ބުޅާތައް ގެންދަން ފަށައިފި ނަމަ، ބުޅާތަކުގެ ސިއްހަތަށާއި ދުޅަހެޔޮ ކަމަށް ނޭދެވޭ އަސަރުތަކެއް ކުރުން އެކަށީގެންވާތީ ކަންކަން ފުރިހަމަ ކުރުމަށް ފަހުގައި ނޫނީ އެތަނަށް ބުޅާތައް ނުގެންދިއުމަށް އެގްރިކަލްޗާ މިނިސްޓްރީން އިއްޔެ އޮތީ އިލްތިމާސްކޮށްފަ އެވެ.
ބުޅާ ފެސިލިޓީ މިނިސްޓްރީއާ ހަވާލު ކުރުމަށް ނިންމާފައިވަނީ މިއަދު ބޭއްވި މާލެ ސިޓީ ކައުންސިލްގެ 4 ވަނަ ދައުރުގެ 174 ވަނަ ޖަލްސާއިންނެވެ.
އެ ޖަލްސާގައި މޭޔަރު އާދަމް އާޒިމް ވިދާޅުވީ، އިއްޔެ ބުޅާތައް ފެސިލިޓީއަށް ގެންދިއުމުގެ މަސައްކަތް ކުރަން ނިންމާފައިވަނިކޮށް، ބުޅާ ފެސިލިޓީގެ މަސައްކަތް އަދި ނުނިމޭ ކަމަށް މިނިސްޓްރީން ބުނެފައިވާ ކަމަށެވެ.
ނަމަވެސް، އާޒިމް ވިދާޅުވީ، މިނިސްޓްރީއާއެކު ވެވުނު އެއްބަސްވުމުގައި ބަޔާންކޮށްފައިވާ މިންވަރަށްވުރެ ފުރިހަމައަށް އެތަން ތަރައްގީ ކޮށްފައިވާ ކަމަށެވެ.
ފެސިލިޓީގެ މަސައްކަތް ގޮސްފައިވާ ހިސާބު ސާފު ކޮށްދެއްވަމުން އާޒިމް ވިދާޅުވީ، އެ ފެސިލިޓީ ހުޅުވާ، ބުޅާތައް ގެންދިއުމަށް ތައްޔާރު ކޮށްފައިވާ ކަމަށެވެ. ޖަނަވާރުންނަށް ހާއްސަ ޑޮކްޓަރެއް ހަމަޖެހި، ބުޅަލަށް ކާންދޭ ތަކެތި ވެސް އިއްޔެ ހޯދާފައިވާ ކަމަށެވެ.
އޮޅުހިޔާގެ އޮޕަރޭޝަން ތިއޭޓަރު - ފޮޓޯ: ރައީސް މުއިއްޒު އެކްސް އެކައުންޓް
މޭޔަރު ވިދާޅުވީ، ބުޅާ ފެސިލިޓީ ހެދުމުގެ މަސައްކަތް ކުރީ މާލެ ސިޓީ ކައުންސިލުގެ ބަޖެޓުން ކަމަށެވެ. އެހެންކަމުން އެ ހަރަދު ވެސް އަނބުރާ ކައުންސިލަށް ލިބެންޖެހޭ ކަމަށެވެ.
"ހަރަދު ވެސް އަޅުގަނޑުމެންނަށް ލިބެންޖެހޭ އެބަ އެހެން ގޮތަކަށް ދަންޏާ. އެއްވެސް ބަޖެޓެއް މިތަނަކަށް ލިބިފައެއް ނުވޭ މިކަންކުރުމަށް. ހަމަ ފުލީ މިތަނުގެ ބަޖެޓުން އެކަން ކުރީ. މިތަނުގެ މުވައްޒަފުން،" އާޒިމް ވިދާޅުވި އެވެ.
ސިޓީ ކައުންސިލުން ބުޅާ ފެސިލިޓީ ގާއިމްކުރުމަށް އެ ކައުންސިލުގެ ބަޖެޓުން ކުރި ހަރަދު އަނބުރާ ލިބެންޖެހޭނެ ކަމަށް ވިދާޅުވެ، އެ ހަރަދު ލިބޭގޮތަށް މިނިސްޓްރީއާ ފެސިލިޓީ ހަވާލު ކުރުމަށް ޑެޕިއުޓީ މޭޔަރު އަހުމަދު ނަރީޝް ހުށަހެޅުއްވި އެވެ.
"... މިނިސްޓްރީއިން އެގޮތަށް އެދޭކަމަށް ވަންޏާ، އަޅުގަނޑަށް ފެންނަނީ ކައުންސިލުން ކުރި ހަރަދެއް ވިއްޔާ ކައުންސިލަށް ލިބެންވާނޭ. އެއީ ކައުންސިލުގެ ބަޖެޓުން ކުރި ހަރަދެއް. އެހެންވީމަ އެ ބަޖެޓުން ކުރި ހަރަދު ލިބޭގޮތަށް އެތަން ހިންގުން މިނިސްޓްރީއާ ހަވާލުކުރަން އަޅުގަނޑު ހުށަހަޅަން،" ނަރީޝް ވިދާޅުވި އެވެ.
މަޝްވަރާއަށް ފަހު އެ ބައްދަލުވުމުގައި ނިންމީ، މިނިސްޓްރީން ފެސިލިޓީގެ މަސައްކަތް ފަށައިގަންނާނެ ވަކި ޓައިމްލައިނެއް ލިބި، ކައުންސިލުން ކުރި ހޭދަ އަނބުރާ ލިބޭ ގޮތަށް ބުޅާ ފެސިލިޓީ މިނިސްޓްރީއާ ހަވާލު ކުރުމަށެވެ.
އެގޮތަށް ކައުންސިލް ބައްދަލުވުމުން ނިންމާފައިވަނީ، ބައްދަލުވުމަށް ހާޒިރުވެ ތިއްބެވި ހުރިހާ ކައުންސިލަރުންގެ ވޯޓުންނެވެ.
މާލޭގެ މަގުތަކުގައި ގިނަވަމުންދާ ބުޅަލުގެ މައްސަލައަށް ދާއިމީ ހައްލެއް ހޯދުމުގެ ގޮތުން ޒަމާނީ ފެންވަރަށް ތަރައްގީކޮށްފައިވާ ފެސިލީޓީ ހުޅުވީ މިދިޔަ މަހުގެ ދެވަނަ ދުވަހު އެވެ.
Ads by STO
