ބިންވެރިޔާ ސްކީމްގެ ކޮރަޕްޝަންގެ މައްސަލައާގުޅޭ ގޮތުން އޭސީސީއާއި ފުލުހުންނާ މަޝްވަރާތަކެއް
މިހާރު ފެންމަތިވެގެން އުޅޭ "ބިންވެރިޔާ" ސްކީމުގެ ކޮރަޕްޝަންގެ މައްސަލައާގުޅޭ ގޮތުން އޭސީސީއާއި ފުލުހުންނާ މަޝްވަރާތަކެއް ކޮށްފި އެވެ.
ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދާއި އެހެން މީހަކު ހިމެނޭ މައްސަަލައެއް އެންމެ ފުރަތަމަ ފެންމަތިވީ އިއްޔެ ސޯޝަލް މީޑިއާއިންނެވެ.
ސޯޝަލް މީޑިއާއިން އާންމުވި ލިޔުންތަކުން އެނގޭ ގޮތުން ގޯތި ލިބުނު ކަމަށް ބުނާ ފަޒުލްގެ ބޭބެ އާއި އެހެން މީހަކު ވަނީ ވަށާފާރު ރޭނުމުގެ ހުއްދައަށް އެދި އެޗްޑީސީގެ ޕޯޓަލްއަށް ހުށަހަޅާފަ އެވެ. އެހެންވެ އެ ދެ މީހުންނަށް ގޯތި ލިބިފައިވާކަން ކަށަވަރު ކުރުމަށް އެޗްޑީސީން ހައުސިން މިނިސްޓްރީއަށް ސިޓީއެއް އޮތީ ފޮނުވާފަ އެވެ.
ނަމަވެސް ހައުސިން މިނިސްޓްރީން ޕޮނުވި ސިޓީގެ ޖަވާބުގައި ބުނީ އެ މީހުންނަށް ބިންވެރިޔާ ސްކީމުން ގޯތި ލިބިފައިނުވާ ކަމަށެވެ.
އެ މައްސަލަ އޭސީސީން ބަލަން ފަށާފައިވާ އިރު ހަމަ އެ މައްސަލައިގައިި އިއްޔެ ފުލުހުން ވަނީ އެޗްޑީސީގެ އޮފީހަށް ވަދެފަ އެވެ.
ފުލުހުންގެ ހިދުމަތުން ބުނީ އޭސީސީއާއެކު ބޭއްވި ބައްދަލުވުމުގައި ފުޅާ ދާއިރާއެއްގައި މަޝްވަރާތަކެއްކޮށްފައިވާ ކަމަށެވެ. ނަމަވެސް އޭގެ އިތުރު ތަފްސީލެއް ނުދެ އެވެ.
އެ މައްސަލައާ ގުޅިގެން އެޗްޑީސީގެ ޑިރެކްޓަރުންގެ ބޯޑުގައި ހިމެނޭ ބޭފުޅުންގެ ތެރެއިން ޗެއާމަން އަހްމަދު ނާސިފް ފިޔަވާ އެހެން ބޭފުޅުން ވަނީ ސަސްޕެންޑްކޮށްފަ އެވެ. އަދި އެމްޑަބްލިޔުއެސްސީއިން ފަޒީލްވެސް ވަނީ ސަސްޕެންޑްކޮށްފަ އެވެ.
ބިންވެރިޔާ ސްކީމުގެ މައްސަލަ ފުލުހުން ބަލަން ފަށާފައިވާާ އިރު ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
އެ މައްސަލަގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ އެކަން ތަހުގީގުކުރުމަށްފަހު ދައުވާކުރުމަށްޓަކައި ހުށަހެޅުމަށް ޕްރޮސިކިއުޓާ ޖެނެރަލް އައްބާސް ޝަރީފް މިއަދު ވަނީ ފުލުހުންނާއި އޭސީސީއަށް އަމުރުކޮށްފަ އެވެ.
ޕީޖީއިން ބުނީ އެ މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފްތާއަކު 1 ފަހަރު ޕީޖީއާ ހިއްސާކުރަމުން ގެންދިއުމަށާއި އެ މައްސަލައިގެ އަވަސް ތަހުގީގެއް ހިންގުމަށް ޕީޖީއިން އަމުރުކޮށްފައިވާ ކަމަށެވެ.
