މިފްކޯގެ ސީއެފްއޯ އިލްޔާސް މަގާމުން ދެއްވައިފި
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ޗީފް ފައިނޭންޝަލް އޮފިސަރު (ސީއެފްއޯ) ގެ މަގާމުގައި ހުންނެވި އިލްޔާސް ހަނީފް އިސްތިއުފާ ދެއްވި އެވެ.
އިލްޔާސް މިފްކޯގެ ސީއެފްއޯގެ މަގާމަށް އައްޔަންކުރީ އެމްޑީޕީގެ ނިމިދިޔަ ވެރިކަމުގެ ދުވަސްވަރުގަ އެވެ. ދައުރު ބަދަލުވިއިރު އަދި އެ ކުންފުނީގެ ސީއީއޯ ކަމަށް އަހްމަދު ސަމާހު ރަޝީދު އައްޔަންކުރިއިރު ވެސް ސީއެފްއޯގެ މަގާމުގައި ހުރީ އިލްޔާސް އެވެ.
ސަމާހުގެ މައްސަލަތަކެއް ފެންމަތިވެ އޭނާގެ މައްސަލަ ޕީސީބީން ބަލަން ފެށުމާ ގުޅިގެން ކުންފުނި ހިންގަން ހަވާލުކުރީ އިލްޔާސް އަށެވެ. މައްސަލަ ބެލުމަށް ފަހު ސަމާހު މަގާމުން ވަކިކުރުމާ ގުޅިގެން ސީއީއޯއެއް އައްޔަންކުރެވެންދެން ވަގުތީ ގޮތުން ހިންގީ ވެސް އޭނާ އެވެ.
ގާތްގަނޑަކަށް ހަތަރު އަހަރު ދުވަހު ދުވަހު މަސައްކަތް ކުރެއްވުމަށް ފަހު މަގާމުން އިސްތިއުފާ ދެއްވާފައި ވަނީ ހުސްވި މަހުގެ ފަހުކޮޅުގަ އެވެ. މައުލޫމާތު ލިބޭ ގޮތުން އިލްޔާސް އިސްތިއުފާދިނީ އަމިއްލަ ސަބަބުތަކަކާ ހުރެ އެވެ.
އެހެންނަމަވެސް އިތުބާރުހުރި ގޮތަކަށް "ދެން" އަށް އެނގިފައިވާ ގޮތުގައި އޭނާއަށް މަގާމުން އިސްތިއުފާ ދިނުމަށް އެންގި އެވެ. އެގޮތަށް އަންގާފައި ވަނީ ކުންފުނި ހިންގުމާ ހަވާލުހުރެ ބޮޑެތި ގޯސްތަކެއް ހަދާފައިވާ ކަމަށް ސަރުކާރަށް ގަބޫލުކުރެވޭތީ އެވެ. ފިޝަރީޒް މިނިސްޓްރީ އާއި ފިނޭންސް މިނިސްޓްރީ އާ މަޝްވަރާ ކުރެވި ކުންފުނިން ކުރަން ނިންމި ބައެއް ކަންކަން ވެސް އަމިއްލައަށް ކޮށްފައިވާ ކަމަށް ވެ އެވެ.
ކަމާ ގުޅިގެން މި ނޫހުން އިލްޔާސްއަށް ގުޅަން މަސައްކަތްކުރި ނަމަވެސް ފޯނަށް ޖަވާބު ދެއްވާފައި ނުވާތީ އިތުރު މައުލޫމާތެއް ލިބިފައެއް ނުވެ އެވެ.
މިފްކޯއިން ހުސްވި މަހުގެ 9 ވަނަ ދުވަހު އެ ކުންފުނީގެ ސީއީއޯއަކަށް ޔުކްރެއިނަށް ނިސްބަތްވެ ވަޑައިގަންނަވާ ޑރ. ވިޓާލީ ލުބިމޯވް ވަނީ އައްޔަންކޮށްފަ އެވެ. ރަސްމީ ގޮތުން މަސައްކަތާ ހަވާލުވެ ވަޑައިގެންނެވުމަށް ފަހު އޭނާ މިވަގުތު ހުންނެވީ ކުރު ޗުއްޓީއެއްގަ އެވެ. ވަރަށް އަވަހަށް އަލުން މަސައްކަތާ ގުޅިވަޑައިގަންނަވާނެ ކަމަށް އެ ކުންފުނިން މައުލޫމާތުދެ އެވެ.
ސީއެފްއޯގެ މަގާމުން އިލްޔާސް އިސްތިއުފާ ދެއްވާފައިވާއިރު، ނިމިދިޔަ މަހުގެ 30 ވަނަ ދުވަހު އެ ކުންފުނީގެ ޗެއާމަނަކަށް ހުންނެވި އަހުމަދު ޝަރީފް ވަނީ މަގާމުން ވަކިކޮށްފަ އެވެ. އަދި ހަމަ އެ ދުވަހު އޭނާ މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން (އެމްއެފްއޯއާރްއެމްޕީސީ) ގެ ޗެއާމަންގެ މަގާމަށް ވަނީ އައްޔަންކޮށްފަ އެވެ.
Ads by STO
