ޕާކިސްތާނުގައި ޕޯލިއޯގެ އާ ކޭސްތަކެއް ފާހަގަކުރެވިއްޖެ
ޕާކިސްތާނުގެ ޑެރާ އިސްމާއިލް ހާން (ޑީއައި ހާން) ސަރަހައްދުން އާ ޕޯލިއޯ ކޭސްއެއް ފާހަގަކުރެވިފައިވާ ކަމަށް އެ ގައުމުގެ ސިއްހި އިދާރާތަކުން ހާމަކޮށްފި އެވެ.
މި ކޭސްތަކާއެކު 2024 ވަނަ އަހަރު ޕާކިސްތާނުގައި ފާހަގަކުރެވުނު ޕޯލިއޯ ކޭސްތަކުގެ އަދަދު 72 އަށް އަރާފައިވާކަމަށް ސިއްހީ އިދާރާތަކުން ހާމަކުރެ އެވެ.
ނޭޝަނަލް އިންސްޓިޓިއުޓް އޮފް ހެލްތުން ބުނީ މި އެންމެ ފަހުން ފާހަގަކުރެވުނު ކޭސްއަކީ 18 މަހުގެ ކުޑަކުއްޖެއްގެ ކިބައިން ފެނިފައިވާ ކޭސްކަމަށެވެ. އަދި އެއީ ވައިލްޑް ޕޯލިއޯ ވައިރަސް ޓައިޕް 1 (ޑަބްލިއުޕީވީ1) ކަމަށް ހެލްތުން ޔަގީންކޮށްދިނެވެ.
ޕާކިސްތާނުގެ ސިއްހީ ވުޒާރާއިން ބުނީ މި އަހަރުގެ ތެރޭގައި ފާހަގަކުރެވުނު 72 ކޭސް ގެ ތެރެއިން 54 ކޭސް ފެނިފައިވަނީ ހައިބާ ޕަހްތުންހްވާ ސޫބާއިން ކަމަށެވެ. އަދި 14 ކޭސް ބަލޫޗިސްތާން އިން ފެނިފައިވާއިިރު، ސޫބާއިންނާއި ސިންދު ސޫބާއިން 4 ކޭސް ފެނިފައިވާކަމަށް އެ ވުޒާރާއިން ބުންޏެވެ.
ޕޯލިއޯ ފެތުރުން ހުއްޓުވުމަށްޓަކައި ޕާކިސްތާނު ސަރުކާރުން ވަރަށް ބޮޑު މަސައްކަތްތަކެއް ކުރަމުންދާކަމަށް ސިއްހީ ވުޒާރާއިން ބުނެފައިވެ އެވެ. މީގެ ތެރޭގައި ގައުމީ ފެންވަރުގައި ހިންގާ ވެކްސިނޭޝަން ކެމްޕޭނުތަކާއި، ސިއްހީ ހޭލުންތެރިކަން އިތުރުކުރުމުގެ ޕްރޮގްރާމްތައް ހިމެނެ އެވެ.
ދުނިޔޭގެ ސިއްހަތު ޖަމިއްޔާއިން (ޑަބްލިއުއެޗްއޯ) އިން ވަނީ ޕާކިސްތާނުގައި ޕޯލިއޯ ކޭސްތައް އިތުރުވަމުންދާތީ ކަންބޮޑުވުން ފާޅުކޮށްފަ އެވެ. އަދި މި ބަލި ފެތުރުން ހުއްޓުވުމަށް އިތުރު ފިޔަވަޅުތައް އަޅަން ޖެހޭކަމަށް އެ ޖަމިއްޔާއިން ބާރުއަޅާފައިވެ އެވެ.
