ކުޑަދޮރަކުން ކުއްޖަކު ނުކުންނަން އުޅޭ ވީޑިއޯ ނަގަން ފުލުހުން އަންގައިފި
މާލެ ގެއެއްގެ 5 ވަނަ ފަންގިފިލައެއްގެ ކުޑަދޮރަކުން ކުޑަކުއްޖަކު ނިކުތުމަށް މަސައްކަތްކުރާ މަންޒަރު ފެންނަ ވީޑީއޯ ސޯޝަލް މީޑިއާގެ ޕްލެޓްފޯމްތަކުގައި ދައުރުނުކުރުމަށާއި، އަދި އެ ވީޑީއޯ ނަގަން ފުލުހުން މިރޭ އިލްތިމާސްކޮށްފި އެވެ.
ޝޯޝަލް މިޑިއާގައި ދައުރުވާ ވީޑިއޯއިން ފެންނަނީ ހެންވޭރު ބުރުވެރި މަގުގައި ހުންނަ އިމާރާތަކުން ކުޑަކުއްޖަކު ނިކުންނަން މަސައްކަތްކުރާ މަންޒަރެވެ. އެ ވީޑިއޯއިން ފެންނަ ގޮތުން އެ ކުއްޖާ ނުވެއްޓި ސަލާމަތްވީ ކިރިޔާ އެވެ. ވެއްޓެން އުޅެނިކޮށް ގެއެއްގެ ތެރެއިން މީހަކު ވަނީ އެ ކުއްޖާ ސަލާމަތްކޮށްފަ އެވެ.
އެ ވީޑިއޯގެ ވާހަކަތައް ނޫސްތަކުންވެސް ރިޕޯޓްކޮށްފައި ވަނިކޮށް މީޑިއާތަކަށް މިރޭ ފޮނުވި މެސެޖެއްގައި ފުލުހުން ބުނީ ދައުރުވާ ވީޑިއޯ ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި އަޅަން ޖެހޭ ފިޔަވަޅުތައް އަޅަމުންދާ ކަމަށް ފުލުހުންގެ މެސެޖުގައި ބުންޏެވެ.
"މި ވީޑިއޯ ދައުކުރުން ހުއްޓާލައި ވީޑިއޯ ރިމޫވްކޮށްލަން އަޅުގަނޑުމެން އެންމެހާ ފަރާތްތަކަށް އިލްތިމާސްކުރަމެވެ"
ފުލުހުން ބުނިގޮތުގައި ވީޑިއޯތައް ދައުރު ކުރުމަކީ އެ ކުއްޖާއާއި ކުއްޖާގެ އާއިލާ، އާންމުންގެ ފާޑުކިޔުމާއި ނަފްސާނީ ގޮތުން އަނިޔާއަށް ހުށަހެޅިގެން ދާނެކަމެއް ކަމަށެވެ. އާއިލާގެ އިތުރުން، އެ ވީޑިއޯ ފެންނަ ކޮންމެ މީހަކަށްވެސް ނަފްސާނީގޮތުން އަސަރު ކުރުމަކީ އެކަށީގެންވާ ކަމެއް ކަމަށެވެ.
"މީގެ އިތުރުން، މިފަދަ މަންޒަރުތަކުގެ ސަބަބުން، ކުޑަކުދިން ނުވަތަ ވަލްނެރަބްލް މީހުން، ޓްރިގާވެ، އެމީހުން ނުރައްކަލަކަށް ހުށަހެޅިދާނެކަމަށް އަޅުގަނޑުމެން ދެކެމެވެ"
އެއީ ސަމާލުކަން ހޯދުމަށް މަސައްކަތްކުރާ ސަގާފަތެއް އާލާވެ، ސަލާމަތާއި ރައްކާތެރިކަމާ ގުޅޭ މުހިންމު ކަންކަމަށް ދެވޭ ސަމާލުކަން ކުޑަވެގެން ހިނގައިދާނެ ކަމެއްކަން ފާހަގަކޮށް ފުލުހުން ވަނީ އޭގެ ބަދަލުގައި ރައްކާތެރިކަމުގެ ފިޔަވަޅުތަކަށް އަހައްމިއްޔަތުކަން ދިނުމަށް އެދިފަ އެވެ.
އެ ހާދިސާއާ ގުޅިގެން އެއްވެސް ފަރާތެއްގެ ކަންބޮޑުވުމެއް ނުވަތަ މައުލޫމާތެއްވާނަމަ، ފުލުހުންގެ ނަންބަރު 3322111 އަށް ގުޅައި ހިއްސާކުރުމަށް އެދިފައިވެ އެވެ.
