2023 ވަނަ އަހަރު ލޯންޗް އެކްސިޑެންޓެއްގައި މީހަކު މަރުވި މައްސަލާގައި ދެ ކެޕްޓަނުންނަށް ދައުވާކުރަން ފޮނުވައިފި
2023 ވަނަ އަހަރު ފޭދޫ ފިނޮޅު ކައިރިން ދެ ލޯންޗު ޖެހި ހިނގި އެކްސިޑެންޓެއްގައި މީހަކު މަރުވި މައްސަލައެއްގައި، އެ ދެ ލޯންޗުގެ ކެޕްޓަނުންނަށް ދައުވާކުރަން ފުލުހުން ޕްރޮސެކިއުޓާ ޖެނެރަލްގެ އޮފީސް (ޕީޖީ) އަށް ފޮނުވައިފި އެވެ.
ފުލުހުންގެ ވެބްސައިޓުގައި މިއަދު ޝާއިއުކުރި ހަބަރެއްގައި ބުނީ އެ އެކްސިޑެންޓް ހިނގީ އޭޕްރީލް 29، 2023 ގެ 16:42 ހާއިރު "ސަސް އީ ސްޕީޑް" ލޯންޗާއި "އެމްޑަބްލިޔުއެސްސީ މެރިން 2" ޖެހިގެންނެވެ.
އެ އެކްސިޑެންޓުގައި މަރުވީ 52 އަަހަރުގެ ފިރިހެނެކެވެ. އޭނާ މަރުވީ އެކްސިޑެންޓްގައި ލިބުނު އަނިޔާތަކަށް އޭޑީކޭ ހޮސްޕިޓަލްގައި ފަރުވާދެމުން ދަނިކޮށް އެދުވަހުގެ 18:15 އެހާކަންހާއިރު ކަމަށް ފުލުހުން މައުލޫމާތު ދީފައިވެ އެވެ.
ފުލުހުން ބުނީ އެ މީހާ މަރުވި މައްސަލާގައި ދައުވާ ކުރުމަށް ފޮނުވާފައިވަނީ ކ. ކާށިދޫ / ހީނާވިލާ، ޔާނިސް ހަމީދު (35އ) އާއި ހދ. ނޮޅިވަރަން/ ގްރީންހައުސް، މުހައްމަދު ޖަމީލް (43އ) މައްޗަށް ކަމަށެވެ.
"މި ދެމީހުންނަކީ އެދުވަހު އެކްސިޑެންޓް ހިނގި ވަގުތު އެ ދެލޯންޗު ދުއްވަން ތިބި މީހުންނެވެ" ފުލުހުން ބުނީ ތަހުގީގު ނިންމައި އެދެމީހުންގެ މައްޗަށް ޖިނާއީ ދައުވާކޮށްދިނުމަށް އެދި ޕީޖީ އޮފީހަށް އެންމެ ފުރަތަމަ މައްސަލަ ފޮނުވާފައިވަނީ ޖޫން 4، 2023 ގައި ކަމަށެވެ.
ނަމަވެސް މައްސަލަ އިސްލާހުކުރުމަށް އަނބުރާ ފޮނުުވުމަށްފަހު ދެވަނަ ފަހަރަށް މައްސަލަ ޕީޖީ އޮފީހަށް ފޮނުވާފައިވަނީ މި މަހުގެ 15 ވަނަ ދުވަހު ކަމަށް ފުލުހުން ބުންޏެވެ.
