ދިވެހި ޕައިލެޓުން ތަމްރީނުކުރުމަށް ސްލޮވީނިއާގެ މަރުކަޒަކަށް ހުއްދަދީފި

ރާއްޖޭގެ ސިވިލް އޭވިއޭޝަން އޮތޯރިޓީގެ މިންގަނޑުތަކާ އެއްގޮތަށް ދިވެހި ޕައިލެޓުންނަށް ތަމްރީނު ދިނުމަށްޓަކައި، ސްލޮވީނިއާގެ އޭވިއޭޝަން ކެރިއާ ސެންޓަރު (އޭސީސީ)އަށް 'އެޕްރޫވްޑް ޓްރެއިނިން އޯގަނައިޒޭޝަން'ގެ ލައިސަންސް ރަސްމީކޮށް ދޫކޮށްފިއެވެ.

ސިވިލް އޭވިއޭޝަނުން "އޭޓީއޯ 017"ގެ ގޮތުގައި ރަޖިސްޓްރީކޮށް ދިން މި ހާއްސަ ހުއްދައިގެ ސަބަބުން، ރާއްޖޭގެ ޤަވާއިދުތަކަށް ފެތޭ ގޮތަށް ޕައިލެޓްކަމުގެ ކޯސްތައް ހިންގުމުގެ ފުރިހަމަ ބާރު އެ މަރުކަޒަށް ވަނީ ލިބިފައެވެ. ބައިނަލްއަގުވާމީ ފެންވަރުގައި ހަރަކާތްތައް ފުޅާކުރުމަށް އޭސީސީން ކުރާ މަސައްކަތުގައި މިއީ ލިބުނު ވަރަށް ބޮޑު ކާމިޔާބީއެއް ކަމަށް އެ ފަރާތުން ބުނެފައިވެއެވެ. މިއާ އެކު، ރާއްޖޭގެ އޮނިގަނޑުގެ ތެރެއިން ޕައިލެޓްކަން ކިޔަވަން ބޭނުންވާ ފަރާތްތަކަށް ރައްކާތެރިކަމާ އެކު ފެންވަރު ރަނގަޅު ތައުލީމެއް ޔޫރަޕްގައި ހޯދުމުގެ މަގު ތަނަވަސްވެގެންދާނެއެވެ.

އޭޓީއޯ ލައިސަންސްގެ އިތުރުން، ސްލޮވީނިއާގެ މާރިބޯ ސިޓީގައި ގާއިމުކޮށްފައިވާ އޭސީސީގެ ފްލައިޓް ސިމިއުލޭޓަރަށް ވެސް ރާއްޖެއިން ވަނީ ކޮލިފިކޭޝަން ސެޓްފިކެޓެއް ދީފައެވެ. "އެއަރޯޕްލޭން އެފްއެންޕީޓީ ލެވެލް 2"ގެ ދަރަޖަ ދީފައިވާ މި ޒަމާނީ ސިމިއުލޭޓަރަކީ މަލްޓި-އެންޖިން ޕިސްޓަން މަތިންދާބޯޓުތައް ދުއްވަން ދަސްކުރުމަށް ހާއްސަކޮށް ފާސްކޮށްފައިވާ އާލާތެކެވެ. މިއީ ސިވިލް އޭވިއޭޝަނުން ގަބޫލުކުރާ ކޯސްތަކުގެ އަމަލީ ތަމްރީނުތަކުގައި ބޭނުންކުރުމަށް ހުއްދަ ލިބިފައިވާ ވަސީލަތެކެވެ.

ބޭރު ގައުމުތަކުގެ އޭވިއޭޝަން ސްކޫލްތަކަށް ރާއްޖެއިން މިފަދަ ހުއްދަތައް ދެމުން އަންނައިރު، ރާއްޖޭގެ އެތެރޭގައި ވެސް ޕައިލެޓުން ބިނާކުރުމުގެ މަސައްކަތް ފުޅާ ދާއިރާއެއްގައި އަންނަނީ ކުރަމުންނެވެ. މިގޮތުން އައްޑޫ ސިޓީ ގަމުގައި ހިންގާ ޒެނިތު އޭވިއޭޝަން އެކަޑެމީ މެދުވެރިކޮށް ގިނަ އަދަދެއްގެ ދިވެހި ޒުވާނުން މިހާރު ވެސް އަންނަނީ ޕައިލެޓްކަމުގެ ތަމްރީނުތައް ފުރިހަމަކުރަމުންނެވެ.